vishv rediyo divas par vishesh
aaj yani 13 faravari 2012 ko yunesko dvara pahali bar vishv rediyo divas manaya ja raha hai. rediyo se hamari bhi dher sari purani yaden judi hai, lijiye pesh hai, meri kuchh purani yaden, chaliye isi bahane ham rediyo ko yad kar lete hain.
purane jamane me jin logon ke pas rediyo huaa karata tha, vo apane ghar ke bahar ek jali vala tar tanga karate the, ab ye baitar risepshan ke liye tha ya fir dikhava, mere ko nahi pata. lekin jinake ghar kee balakani ya aangan me jali vala tar tanga rahata tha, unako log bada samman dete the aur unakee taraf bahut ijjat kee nigah se dekha karate the. log bag bhi apane rediyo ka dikhava karane me pichhe kahan rahate the. mujhe yad hai hamare ghar me bhi ek rediyo huaa karata tha, jis par sirf aur sirf dadaji ka hak huaa karata tha. majal hai jo koee doosara hath bhi laga de, dadaji apani chhadi se kutaee kar diya karate the. aksar dada dadi me rediyo ko lekar baval huaa karata tha. dadaji apane rediyo ka dikhava karane ke liye aksar logo ko ghar bulate,pahale chay nashta aur fir khana tak khilavate the. log bag bhi samachar sunane ka bahana banakar aate, chay nashta karate, bhale hi rediyon me shastraeey gayan ya karnatak sangit sabha chal rahi hoti, bakayada date rahate aur khana dakarakar hi jate….muft ka khana kaun chhodata hai bhala? khair jamana badala, rediyo gaya, tranjistar aaye. ab log bag apane sath tranjistar lekar chalane lage, jisako dekho kan se lagakar sunata tha, kya sunata tha? ye to usako bhi nahi pata. logabag disha maidan ko jate to tranjistar le jana na bhoolate, lata ke git hon ya rafi ke nagame ya fir indu vahi ke samachar, bakayada poora poora sunate. gharon me pange badh gaye the, logabag laitrin me bhi tranjistar le jate aur ghanton vanhi baithe rahate. hamare yahan bhi kafi pange hote, lekin masala doosara tha. pitaji ek tranjistar le aaye the aur usase dadaji ke rediyon kee poochh kam ho gayi thi. dadaji rozana tranjistar kee kamiya ginate. aksar tranjistar ko akela pakar apani chhadi se dhunaee karate. ab usaka kya bigadane vala tha. khair vo jamana bhi gaya. dadaji bhi jannatanashin hue aur rediyon bhi apani kabragah me chala gaya. ab jamana aaya telivijan ka.
bat un dino kee hai, jab telivijan bhi nahi aaya tha.mai garmiyon kee chhutti me apani buaa ke yahan ulhas nagar(mumbaee ke pas) gaya tha aur pahali bar telivijan ko dekha. bahut aashchary chakit ho gaya ki kaise ek bakse ke andar baithe log hamase bat karate hai.hamare buaa ke ladakon ne bhi hamari nasamajhi ka fayada uthaya aur na jane kya kya gappe hankee, aur deli deli hamako gappon ka naya doj pilate rahe. khair ham ek achchhe bachche kee tarah se sari gappe jhelate rahe aur apane dimag me sahejate rahe, kyo? are bhaee kanapur jakar sari gappon me namak mirch lagakar apane doston ko jo sunana tha. khair janab! ham kanapur pahunche aur apane dosto yaron ko kahani sunaee, sukkhi to bikhar gaya, baola ye to ho hi nahi sakata ki rojana koee chhat par lage ek dande me lage chhedon me se aapake ghar me ghus aaye aur ek bakse me baithakar aapase bate karane lage. dhiroo aur doosaron ne bhi han me han milaee. lekin ham dekh chuke the, isaliye tas se mas na hue, kafi jhagada huaa,ladaeeyan huee, ham log guton me bante, fir bhi log manane ko taiyar hi nahi hue. hamane bhi samajhana chhod diya aur sabakuchh vakt par chhod diya gaya. dhire dhire samay badala aur tivi ne panv pasare. lakhanaoo dooradarshan kendr bana. mohalle me pahala tivi hamare ghar par laga, mohalle ke ladakon ne tivi ke masale par hamari sari gappon ko tavajjo deni shuru kar di thi.
ab logon kee balakani se jali vali tare hatani lagi aur unakee jagah li chhaton par bade bade telivijan ke entina ne. fir bhi mohalle me ikka dukka entina hi dikhate the. ham log chhat par jakar intina ginane ka khel khelate. logo ka rootaba entina se jana jata, jisaka entina jyada ooncha, usakee utani jyada hainkadi. varmaji ka sara taim to chhat par ye dekhane me lag jata tha ki unaka entina bagal vale sharma ji ke entina se nicha na rahe. kaee bar to is chakkar me hi varmaji entina samet chhat se tapake the. ham logo ko patang udane me dikkato ka samana karana padata tha, apani chhat se patang ud sake to sharma ji ke entine se atakati, vahan se bacho to varma ji ke entine me patang atak jati thi, na jane kitani patange shahid huee, ab aamir khan ko stori sunaye to vo shayad pikchar bana de, is par. kul milakar vanar sena ko pareshani aati thi.
ab logon ka laifastail badal raha tha. ab logo kee ravivar kee shamen ghar ke andar hi bita karati..kyon? are bhaee sande ko fichar film jo aati thi. hamare tivi kee kahani bhi sun lijiye…..hamare ghar bhi tivi ka padarpan huaa, tivi ka sthapan kiya gaya,bakayada pooja path aur nariyal tak foda gaya. chhote bachchon jisame ham bhi shamil the, ko bakayada takeed kee gayi ki telivijan ke aasapas bhi na fataken, varana tange todakar duchhatti(jis sajjan ko duchhtti ka matalab na samajh aaye vo furasatiya ji se saval poochhe ) par rakh di jayengi. telivijan aur usame aane vale programon ke khilaf baolana, beadabi aur badatamiji samajhi jati thi. mera chachera bhaee kafi edavencharas tha, so usane telivijan ke batano se chhedachhad kee, jisase chainal ka risepshan kharab huaa, tivi vale injiniyar ankal ko bulana pada, kyonki tivi ke batan vagairaha chhedakar chachaji koee risk nahi lena chahate the, khair ankal aaye, do minat ka kam do ghante me kiya, jisame se ek ghanta anthavan minat to ye samajhane me laga diye ki tivi koee mamooli chij nahi hai, chhedachhad mat kiya kare, isabich do char bar chay nashta dakar gaye so alag.chachaji ne tivi me chhedakhani karane vale kee khoj ke liye ek kameti banaee, kameti ko vishvast sootraon(yani mai)se pata chala ki chachere bhaee ne ye namakool harakat kee thi aur natijatan chachere bhaee kee bahut jabaradast dhunaee hue, sach poochho to dil ko bahut sakun mila, kyonki hamesha usake pango kee vajah se khanmakha mai hi pitata rahata tha.ye ek sabak tha, ham sabake liye usake bad se ham log telivijan se kat liye,thik vaise jaise skool me diye homavark se kate hue the
ab chachaji kee poori kee poori shamen telivijan ke samane nikalane lagi, chahe chaupal ho ya kamagar sabha, chachaji sab kuchh dekhate aur telivijan tabhi band hota jab ratrai vichar bindu ka vakt aata. chachaji bhari man se tivi band karate, tivi ka shatar band karate,us par kapada chadhate……aur usake bad hi dinar karate aur is bich chachi bhinabhinati rahati, lekin kuchh kah nahi pati, kyonki chachaji telivijan ke khilaf kuchh bhi sunana pasand nahi karate the.ab chachaji ka ek naya shagal shuru ho gaya tha, dadaji kee tarah logon ko pakad pakad lana aur telivijan ke program dikhana, aaf kors chay nashta to paikej dil me shamil tha. han telivijan kee aavaj kam jyada karane kee jimmedar abhi bhi chachaji par hi thi aur rimot kantrol? ye kis chidiya ka nam hai? us jamane me rimot kantrol nahi huaa karata tha.logabag bhi aate, tivi kee tarif karate,chay nashta dakarate aur nikal lete.
isabich badakismati se lakhanaoo dooradarshan valon ne bachchon ke liye bhi ek program dena shuru kar diya, natijatan, mohalle ke sare bachchon ko pakada jata, ginati hoti(program ke shuru me aur aakhiri me dono bar)aur telivijan ke aage bitha diya jata aur kaha jata ki chupachap baithakar telivijan dekho. ab dekhe to kya dekhen kuchh palle padata tab na? dooradarshan vale bhi pata nahi kahan kahan se pakad pakad kar logo se telivijan program karavate the, jo kafi samay to apani tarif me bitate, kuchh bachata to bachchon vahi pakee pakaee ghisi piti kavitaye vagairaha padhate, ham log jhele bhi to kaise? lekin chachaji ke dande ka dar tha, ham log chupachap telivijan dekhate, ye bat aur thi ki sabase aage baithene vale dhiroo ko chikoti katate rahate, jisase vo chillata aur chachaji ke dande ka shikar hota. dhire dhire dhiroo ne chikoti par riyekshan karana band kar diya, kyon? aman yar! chikoti ka dard, dande ke dard se kafi kam hota hai, isaliye. ravivar kee sham, ghar kee mahilaon ke liye khasi pareshani bhari hoti, kyonki ravivar ko fichar film aati aur chachaji poore mohalle pahale se hi nimantran de aate, lage hatho aane vali film kee tarif karake logo me jigyaaasa bhar aate. ghar lautate samay tivi dekhane aane vale logo ke liye laiya,chana chabaila aur mungafali ka intajam karana na bhoolate.
tay samay par sabhi log laiya chana aur mungafali lekar film dekhate, film ke drishyanusar hansate rote. hansate samay jyada mungafali khate, aur rote samay chadaron ko kharab karate.mujhe yad hai basantu kee amma apane bachche ko sussu aur pati bhi telivijan ke samane karaee thi, ab telivijan ke liye ye din bhi dekhana padega, kisane socha tha…. kuchh log film khatm hone ke bad bhi dinar khane ke liye latake rahate, bahana hota, samachar dekhane ka. ghar kee mahilayen, manati ki hafte me se ravivar ko nikal diya jana chahiye, kyon? are yar! bahar ke log film dekhe aur ghar kee mahilaye chay nashta banati rahen ye kahan ka insaf hai? film ke bad ghar koodaghar ban jata. kaise? aman yar, mungafali ke chhilake log apane sath le jate kya? lekin dooradarshan valo ko isaka kahan ilm tha, unhone to hafte me do do filme deni shuru kar di, vrihaspativar ka chitrahar aur somavar ka madrasi aur anyabhasha ke ganon chitramala so alag. ab tivi dekhane aane vale logo kee dimand bhi badh rahi thi, log duhaee dete, varma ji to tivi dikhane ke liye bulate hai aur nashte me halava bhi khilate hai. chachaji kee bhrikuti tan jati thi, natijatan bhag bhag kar jalebi vagairaha hame lani padati thi. ab kab tak jhelate ye sab?
ab pani sar se oopar gujar raha tha, so chachaji ko chhodakar sare logon ne planing banaee kee kisi tarah se tivi ko kharab kar diya jay, tivi vale ankal ko sait kiya gaya, unhone jhoothi moothi bataya ki ek speyar part kharab ho gaya hai, aane me ek mahina lagega…… tab kanhi jakar ek mahine ke liye tivi kharab raha tha……sare parivar ne, sivay chachaji ko chhodakar, chain kee sans li. isabich chachaji kya karate rahe? are yar! shahar bhar ke telivijan kee dukanon me speyar part liye liye dhoondhate rahe, ab unako speyar part to tab hi milata na jab vo telivijan ka hota, ham logo ne unako purane kharab rediyon ka speyar part tikaya tha.
dhire dhire vo jamana bhi bita. ab jamana aaya vidiyo ka…………..isakee kahani fir kabhi…abhi ke liye sirf itana hi, aap bhi apane sansmaran likhana mat bhooliyega.
