kabootar jaisaa mashahoor naheen!

vaise to main naatak dekhataa naheen lekin kal ek dekhanaa padaa. prithvee par. vaheen mere ek dost saleem shekh mil gae. mizaajapursee huee. mohabbat ke do bol un ne bole. ekaadhee adaa ham ne bhee dikhaaee. fir kahane lage ki kyaa kar rahe ho aajakal. hamaaraa haal kis se posheedaa hai. sab jaanate hain ki zamaane se berozagaar hoon. vo baat alag hai ki kisee majabooree men naheen apanee marzee se hoon.

kabhee-kabhee dar bhee lagataa hai ki kaheen ek din aisaa n aae ki log kaam ke lie poochhanaa bhee chhod den. log pursish karate rahen aur aap kahen ki amaan jaao yaar kahaan fnsaa rahe ho, hamen apanee aazaadee kaheen pyaaree hai. man-maafik kaam n mile to do-chaar painto aur nae-taaze asabaab kee havas ke lie rupaye ke lie gadhaa majooree karane se to inkaar kee yah lazzat bhalee. nae kapade naheen khareedataa hoon, jahaan tak ho sake bas aur tren se chalataa hoon, sigaret chhod hee chukaa hoon. jab tak sar par naa aa pade gulaamee naheen karenge aisaa sochaa hai.

duniyaa men logon kee tamaam zimmedaariyaan hotee hain. maan-baap, beebee-bachche, bhaaee-bahan. naseeb ne hamen aisee kisee bhee zimmedaaree se aazaad rakhaa hai. agar usake baavajood main mauqe kaa faaedaa n uthaaoon, aur vo n karoon jo vaaqaee dil kee tamannaa hai to nihaayat ahamaq hooongaa. aur apanaa to ulate aisaa khyaal hai ki ham kaafee zaheen hain.

to saleem saahab kahane lage ki yaar hamaare ek dost hain. thiyetar kee badee hastee hain. agale maah ek bade festival ke lie ham se indiyaa tude par das minat kaa pees likhavanaa chaahate hain. par hamen sasuraa vaqt hee naheen mil rahaa, tum likhoge kyaa?

ab indiyaa tude par das minat kaa pees likhanaa kaun badee baat hai. main kyaa koee bhee self respekting blogiyaa likh degaa. aaj kal to vaise bhee saahity-blogity kee badee dhoom hai. mainne bolaa ki befikar rahiye likh doongaa. to kahane lage ki magar un kee thiyetar parsanailtee ne unase likhane ko kahaa hai. aur jab vo kahenge ki falaan saahab likh rahe hain to vo kahenge ki kaun falaan saahab? kyaa javaab denge? yaanee saleem shekh kee to ek shuharat hai, aap kaun? mainne kahaa ki agar aisaa hai to jaane deejiye.

bole naheen ki kar lo, loop men aa jaaoge!

loop men?

ham bamushkil teevee ke loop se baahar nikale hain. masaalaa film ke loop ke jabadon men jaate-jaate khud ko kisee tarah bachaayaa hai. aur ab aap thiyetar ke loop kaa jhunajhunaa hamen jhalakaa rahe hain. had hai. ham ne kahaa ki naheen bhaaee hamen maaf karen ham ab thiyetar ke loop men aane ke lie strgal naheen karenge. saleem miyaan chup ho gae.

fir mainne un se poochhaa ki unhone kabhee kabootar dekhaa hai. zaahir see baat hai sab ne dekhaa hai unhone bhee dekhaa hogaa. kabootar ko kaun naheen pahachaanataa. bole haan. fir mainne poochhaa ki fir to aap ne harevaa bhee dekhaa hogaa?

harevaa?

vo kyaa hotaa hai?

ek pnchhee hotaa hai hare rng kee deh, sar laal, chonch aur galaa kaalaa aur sar se lekar garadan tak ek sunaharee pattee. nihaayat dilakash pnchhee hai.

totaa hai kyaa kisee tarah kaa?

naheen saahab tote se isakaa koee rishtaa naheen. bulabul ke qad kaa hotaa hai aur ghane jngal men basar karataa hai. magar qismat achchhee ho to ho sakataa hai aabaadee ke aas-paas ke darakhton men bhee chhipaa dikh jaay. angrezee men gold franted kloropsis kahate hain.

klopsis..?

gold franted kloropsis.

gold franted kloropsis!?

karekt! isamen bas ek hee nuqs hai.

kyaa?

kabootar jaisaa mashahoor naheen hai.

gilaanee ke aage gulaatee

bhaarat kee paak-neeti misr men munh ke bal gir padee hai. sharm al shekh men gilaanee aur manamohan sinh kee mulaaqaat ke baad ek udghoshanaa ke anusaar :

1) donon desh sabhee muddon par baat karane ko raajee ho gae hai. (sabhee muddon men kashmeer muddaa bhee shaamil maanaa jaaegaa)

2) donon deshon ne maanaa ki aatnkavaad aur vaatacheet ke beech men koee seedhaa snbandh naheen banaayaa jaa sakataa. (yaanee paakistaan kee or se kitanee bhee aatnkee gatividhiyaan ho, bhaarat ye naheen kah sakegaa ki jaao ham tum se baat naheen karate tumane hamen maaraa !)

3) paakistaanee praant baloochistaan men ashaanti par bhaarat baatacheet karane ko taiyaar ho gayaa hai. !!!??? (ye ek paroksh sveekaar hai ki vahaan ho rahe aazaadee ke aandolan ko bhaarat praayojit kar rahaa hai)

paakistaanee pradhaan mntree ne kal raat se hee ise apanee jeet ke roop men prachaarit karanaa shuru kar diyaa hai. jabaki bhaarat ne turnt leepaapotee bhee shuru kar dee hai. bhaarateey meediyaa ise andaraple kar rahaa hai. kal raat en dee tee vee ko chhodakar sab ne maayaa-reetaa vivaad par hee zor banaae rakhaa. akhabaaron men bhee is samarpan ko zyaadaa ahamiyat naheen dee gaee.

jabaki paakistaan men haal ulat hain. nishchit hee yah unakee kootaneetik jeet hai. pichhale maheene hee zaradaaree manamohan ke dvaaraa buree tarah jhidak die gae the sare meediyaa; ki bhaarat sirf aatnkavaad ke rokathaam par hee baat karegaa aur kuchh bhee naheen. aur ek hee maheene men itanee bhee badee gulaatee? raaz kyaa hai.

nishchit hee yah kisee dabaav men huaa hai. aur vah amareekee dabaav ke alaavaa aur kyaa ho sakataa hai. amareekaa ne paakistaan ko taalibaan ke khilaaf ladaaee ke lie kuchh muaavazaa tay kiyaa thaa. ladaaee ladane kee motee aarthik qeemat ke alaavaa unakee mukhy shart bhaarat ke saath sameekaran men apane paksh ko bhaaree karavaanaa hee rahee hogee. jis ko ve saarvajanik roop se bhee kahate rahe hain.

aaj mohataramaa klintan bhaarat padhaar rahee hain. paanch din ke lie. aur sab se dilachasp baat ye hai ki n vo bhaarat aane se pahale paakistaan jaa rahee hain aur n baad men. aisaa pahale kabhee naheen huaa. amareekaa ne hameshaa bhaarat aur paakistaan ko bhaarat-paak kee tarah haaifenet hee kiyaa hai jisake prati lagaataar bhaarat ne shikaayat kee hai. antarraashtreey patal par paakistaan se mukt hokar apanee pahachaan banaane kee yah qeemat chukaa rahaa hai shaayad bhaarat.

meraa khyaal hai ki paakistaan men bhaarat ke prati is nae amareekee jhukaav ko lekar koee aantarik aandolan n khadaa ho jaay isalie bhaarat ko yah kootaneetik gulaatee maaranee padee hai.

bahut saare log desh kee kootaneeti ko shuddh thakuraitee kee nazar se dekhate hain. ghus jaao! khaded do! nestaonaabood kar do! magar desh aise naheen chalataa. kootaneeti men n to koee sthaayee mitr hotaa hai n shatru. yahaan tak ki koee sthaayee neeti bhee naheen hotee; hote hain sirf sthaayee hit.

bahut sambhav hai ki bhaarat ke vartamaan karnadhaaron ne ye faisalaa isalie liyaa ho ki mohataramaa klintan aisaa kuchh de rahee hon jo is gulaatee se kaheen adhik desh ke lie hitakaaree ho!

dekhen kyaa de ke jaatee hain misez klintan!

a sivilaaizd end deesent sosaayatee

bhaarat ne kahaa hai ki paakistaan shud ekt agenst haafiz saeed if it iz a sivilaaizd end deesent sosaayatee. vel sed.

vidambanaa yah hai ki yah bayaan us din aayaa hai jab profesar sabaravaal kee hatyaa ke sabhee aaropiyon ko saboot ke abhaav men adaalat dvaaraa baaizzat rihaa kar diyaa gayaa. mukt hue mulzimon ne maalaaen pahanee, mithaaee chaabhee aur muskuraahaten bikhereen.

kyaa aap ne profesar sabaravaal kee maut se pahale unakee pitaaee kaa veediyo dekhaa thaa. mainne dekhaa thaa.. maze kee baat hai adaalat ke paas ek bhee gavaah naheen koee saboot naheen.

ajeeb baat hai laahaur haaee kort men bhee yahee daleel dekar haafiz saeed ko aazaad chhod diyaa gayaa.

ek kraantikaaree naitikataa kee ummeed

uday prakaash se ek kraantikaaree naitikataa kee ummeed kee jaa rahee hai balki kuchh had tak un par thopee jaa rahee hai. ve is naitikataa ke thope jaane kaa virodh karane ke bajaay saamane vaalon par keechad uchhaal rahe hain. hindee saahity kee duniyaa kaa javaab naheen.

masalaa ye hai ki uday prakaash gorakhapur ke ek aayojan men bhaajapaa ke ugr saansad yogee aadityanaath ke saath n keval mnch par baithe varan unake haathon sammaan bhee grahan kiyaa. sammaan, bataayaa jaa rahaa hai ki uday jee ke divngat bhaaee ke naam par hai.

uday jee kaa saaraa saahity vaamapnthee, pragatisheel moolyon par aadhaarit hai. ab yah ek aam paramparaa ban chukee hai ki kisee bhee saampradaayik, jaativaadee ‘aatataayee’ snsthaa yaa vyakti ke haathon puraskaar ko thokar maar dee jaay. achchhee baat hai. aisaa karane vaale sabhee kalaavanton kaa main naman karataa hoon. haalaanki ye svayn ek aisaa mukut ban chukaa hai jis ke prati ek abhilaashaa paalee jaa sakatee hai – mujhe puraskaar milaa magar mainne thokar maar dee.

meraa maananaa hai ki jeevan aur saahity do alag-alag maamale hain. unamen ek saamy apekshit hai par sahaj praapy naheen. jeevan thos aur kroor hai. saahity taral aur naram hai. usamen vah bahut kuchh vyakt ho sakataa hai jeevan jis kee raah men rode atakaa rahaa ho. saahityakaar samaaj se hameshaa vidroh kee mudraa men hee rahe yah sambhav naheen, vah bahut saare samajhaute karegaa kyonki vah samaaj kaa ang hai. kraantikaaree kee baat alag hai. vah samajhautaaparast jeevan ko thokar maar detaa hai- main nakaarataa hoon tujhe- vah ek nae samaaj kee nirmaan men lag jaataa hai.

jab tak unake saahity men aapattijanak rng naheen ghulane lage yaa unakaa saahity naqalee aur ghatiyaa n ho jaay, hamen shikaayat kyon honee chaahiye? aur jab hone lage to unhe bakhshanaa bhee naheen chaahiye. main pichhale dinon unakee ek farjee kavitaa par apanee niraashaa vyakt kar hee chukaa hoon. isalie bahas unake vyaktitv ke bajaay unake krititv par hotee to behatar thaa.

duniyaa men aap ke aneko aise udaaharan mil jaaenge jisamen bade-bade kalaakaar apane nijee jeevan men hinsak, badamizaaj, chor yahaan tak ki balaatkaaree bhee hue hain. uday prakaash ne to aisaa kuchh bhee naheen kiyaa. samaaj men doosaron ke tulanaa men apane sammaan aur puraskaaro ko lekar ek vipann bhaav se grast rahanaa ek kalaakaar kaa manogat dosh hai.uday prakaash jaise safal aur mashahoor lekhak kaa svayn ko laanchhit aur upekshit mahasoos karanaa khedapoorn hai par theek hai.

uday jee ko ham kraantikaaree ke taur par naheen jaanate, saahityakaar ke bataur pahachaanate hain. n jaane kin kaaranon ke dabaav men unhone yogee aadityanaath se puraskaar lenaa sveekaar kiyaa. gair-saampradaayik, gair-jaativaadee honaa kyaa naitikataa kaa sab se badaa paimaanaa hai?

aur ye maan lenaa bhee bachakaanaa hee hogaa ki tathaakathit gair-saampradaayik, gair-jaativaadee duniyaa men safalataa kee sabhee seedhiyaan subah-shaam naitikataa ke gngaajal se dho kar pavitr rakhee jaatee hain. aaj kal ke akhabaaron aur teevee chainalon ke daur men kaun apanee chadariyaa ke koree hone kaa daavaa kar sakataa hai? diqqat bas itanee see hai ki uday prakaash svayn doosaron ko gaalee dete vaqt inhee maapadando kaa sahaaraa lete hain.

aur ek dukh kee baat ye bhee hai ki ham log behad asahishnu ho chuke hain. kisee bhee chhotee see galatee ko ham nazaraandaaz karane ko taiyaar naheen. mitron ne uday prakaash par jam kar aakraman kiyaa magar shaaleen. par dekh rahaa hoon ki uday jee aakraman se tilamilaakar apanee shaaleenataa kaa vismaran kar baithe. aur unhone ulataa aarop lagaayaa hai ki un kee aalochanaa karane vaale sabhee log saampradaayik, jaativaadee aur n jaane kyaa kyaa hain.

is tarah kee hone vaalee bahason ke dauraan mujhe ye bodh huaa hai ki aajakal kisee bhee vyakti kee izzat utaaranee ho to use saampradaayik aur jaativaadee kee gaalee de do. achchhee baat yah hai ki ye mooly asabhyataa kaa prateek maane jaa rahe hain. afasos kee baat ye hai ki uday prakaash jaise saahity kaa shikhar kahe jaane vaale vyakti ke is aarop ke mool men vahee asaty aur ashleel bhaav hai jisakee abhivyakti pahale maacho-baincho men hotee thee ab aise ho rahee hai.

ek chhilake men do giriyaan

mujhe yaad hain vo din jab main aur meraa dost baadaam ke ek chhilake men do giriyon jaise bane rahate. fir achaanak ham bichhad gae. kuchh vaqt baad meraa dost lautaa aur mujh par ilzaam dharane lagaa ki mainne us dauraan koee qaasid bhee kyon n bhejaa. mainne kahaa ki jis husn se main maharoom hoon us par kisee qaasid kee nazar kyon pade?

n de mujhe salaahe zubaanee kah do mere yaar se.

kyoonki tobaa kroon ye hogaa naheen zore talavaar se॥

dekh naheen sakataa ki ho too gair se razaamand.

main fir kahataa hoon ki ho sabakaa mazaa band॥

terahaveen sadee ke shaaer shekh saadee kee yah laghukathaa samalaingik prem par aadhaarit hai. gulistaan men snkalit is laghukathaa ke aadhaar par bhale ye siddh n ho ki shekh saadee laundebaaz the magar ye to zaroor pataa chalataa hai ki unake kaal men bhee yah tathaakathit beemaaree maujood thee. veshyaavritti kee tarah isakaa bhee itihaas badaa puraanaa hai. baaeebil ke puraane vidhaan men bhee isakaa zikr milataa hai. sodom naam kaa ek shahar thaa (isee ke naam se samalaingikataa sodomee kahalaaee), jisake nivaasee salonee ladakiyon ke bajaay khoobasoorat ladakon ke lie machalate the. baaeebil ghoshanaa karatee hai ki eeshvar ne unake shahar par bijalee giraa kar unhe unake aparaadh kee sajaa dee.

baavajood is ke teenon abraahamapnthee dharmaavalambiyon kee paramparaaon men is beemaaree kee upasthiti banee rahee. yahoodiyon, yoropeey eesaaeeyon aur arab muslim aur gair arab muslim samaajon men samalaingikataa abaadh roop se chalatee rahee. is rujhaan ke logon kee soochee men tamaam bade-bade naam hain jisamen liyonaardo daa vinchee jaise kalaakaar aur baabar jaise senaanaayak shaamil hain. mainne is blog par pahale bhee meer ke shauk ke baare men likhaa hai-

meer kyaa saade hain beemaar hue jisake sabab,
usee attaar ke ladake se davaa lete hain.

aisee laundebaazee ko dharm aur naitikataa tab bhee naheen sveekaaratee thee. magar naseeb vaale the meer ki unake samay is tarah ke rujhaan aparaadh naheen the. angrezo ke aane ke baad lord maikaale ne qaanoon banaa ke ise aparaadh ghoshit kar diyaa. aaj hamaare desh men adaalat ke aadesh se yah sambandh aparaadh naheen rahaa. is kaaran se badaa ho-hallaa hai. log naaraaz hain. snskriti aur paramparaa, dharm aur naitikataa kee duhaaee de rahe hain. unakaa maananaa hai ki ye rujhaan apraakritik hai isalie nindaneey hai. aur samaaj ke lie ghaatak hai aur iseelie aaparaadhik hai.

ek tark yah bhee sunane ko milataa hai ki pashu aisaa naheen karate! vaise yah pooree tarah sach naheen hai kuchh pashu samalaingik vyavahaar pradarshit karate paae gae hain. ek any tark yah bhee diyaa jaataa hai ki ye log jo samalaingik seks kee aazaadee chaahate hain kal ko pashuon se seks karane kee bhee ijaazat maangenge? main aise logon ke tarkon ke aage dhvast ho jaataa hoon. kyaa koee sachamuch ijaazat maang kar yah kaam karataa hai. kyaa kal tak ijaazat n hone par log samalaingik seks naheen kar rahe the aur aaj aazaadee mil jaane par muftiyaa maal kee tarah toot padenge?

kyaa in kaa sochanaa yah hai ki har vyakti ke bheetar samalaingik seks kee aisee bhayaanak chaah hai ki aparaadh kaa dar hatate hee samaaj men prem kaa svaroop dharaashaayee ho jaaegaa? baabaa raamadev kahate hain ki aadamee aadamee par chadhane lagegaa to bachche kaise paidaa honge? yaenee baabaa maanate hain ki log dande ke dar se man maar ke baithe hain? haasyaaspad hai ye soch!

kyaa aap ne aise vyakti naheen dekhe jo nar ke shareer men qaid naaree hain aur aise bhee jo naaree ke shareer men qaid nar hain? zaroor dekhen honge. par main is se alag jaa ke ek aur baat kahanaa chaahataa hoon- nar aur naaree ke charitr kee yah shreniyaan hee galat hain. yah vaastavik naheen kalpit hain. maanaveey gun-doshon kee ye shuddh paribhaashaaen hai. magar vaastavikataa men koee tatv shuddh naheen milataa. shuddh tatv prayogashaalaaon men ashuddh tatvon se alag kar ke paae jaate hain. meree nazar men to galat ye hai ki nar-naaree ke ek kalpanaa kee gaee chhavi ke aadhaar par logon ke baare men koee faisalaa kare. faisalaa kare to kare ye to had hee hai ki fir unhe aaparaadhik ghoshit kare? ab aap bataaiye kaun praakritik hai?

yah theek hai ki manushy ke shareer men yaun ang prajanan ke uddeshy se upaje hain. aur yah baat bhee taarkik lagatee hai ki jo cheez jis uddeshy ke lie banaaee gaee ho vo usee uddeshy ke lie prayog kee jaay. magar prakriti aisaa naheen karatee. prajanan ke lie ek shukraanu hee chaahiye hotaa hai magar prakriti unhe karodo ke snkhyaa men paidaa karatee hai. baboon ke samooh men ek bndar hee prajanan karataa hai magar prakriti prajananaang sabhee nar bndaro ko pradaan karatee hai. poochhaa jaanaa chaahiye ki prakriti har cheez naap-taul ke kyon naheen karatee? aur uddeshy ke tark se ghaayal ye saare log kyaa apanaa saaraa yaunaachaar prajanan ke uddeshy se hee karate hain?

samalaingikataa prakriti ke viruddh hai. chalie maanaa. par manushy ke jeevan men kyaa aur kuchh bhee naheen jo prakriti ke viruddh hai? pakaa huaa bhojan bhee prakriti ke viruddh hai. samalaingikataa kaa virodh karane vaale kyaa mirch-masaale chhod kar kachchaa bhojan khaanaa shuru kar sakenge? eent-gaare kee imaaraten, motarakaar, aur paisaa-rupayaa bhee to prakriti ke viruddh hai. aur to aur kapade bhee prakriti ke viruddh hai. pashchim men ek aisaa aandolan hai jo praakritik hone kee zid men aise samudaay banaa ke rahate hain jisamen kapadon kaa koee istemaal naheen. kyaa samalaingikataa ke virodhee kapade utaar ke nnge rahanaa pasand karenge kyonki eeshvar ne hamen kapade pahanaa ke naheen bhejaa?

aur sabase badaa prakriti kaa virodhee to dharm hai. prakriti to kisee dharm ko naheen maanatee. vo n to gaay khaane se manaa karatee hai n sooar khaane se. praanee jagat men to har jantu svatntr hai us par koee bandish naheen. aur is tark se to manushy par is tarah kee bandishen lagaane vaalaa dharm aap hee apraakritik hai. aur samalaingiko kaa apane svabhaavaavik aakarshan ke prati javaabadaaree baratanaa praakritik.

main maanataa hoon ki naitikataa samaaj ko svasth rakhane kaa ek behatar aacharan hai. par naitikataa sthir to naheen rahatee. desh-kaal-paristhiti ke saapeksh hai. nirantar badalatee hai.aur dhaarmik drishti se to samalaingikataa abhee bhee anaitik hai n! use avaidh banaakar samalaingikon ko nishaanaa kyon banaanaa chaahataa hai dhaarmik netritv? kaheen ye chor kee daadhee men tinake vaalee baat to naheen?

prakriti kaa niyam hai jahaan paanee rokaa jaay vahaan dabaav sabase tez hotaa hai. saath hee mainne aksar mahasoos kiyaa hai ki dharm aur yaunaachaar ek hee sikke ke do pahaloo hain. tntr kahataa hai ki donon ek hee oorjaa kaa upayog karate hain. shaayad iseelie donon men aisaa zabaradast virodh hai. par vo doosaree bahas hai.

ant men itanaa hee kahoongaa ki manushy kaa svabhaav, saamaajik aur dhaarmik naitikataa se kaheen jatil hai aur prakriti ke anant bhaav manushy ke saamaajik paripaatiyon se kaheen viraat hai.

kyaa aap jaanate hain ki kishor dolfins vayaskataa paane ke pahale any prajaatiyon ke jantuon ke saath yaunaachaar ke prayog karate hain?