janaadesh kyaa hai?

kal shaam ko en dee tee vee par chunaav ke nateeje kaa vishleshan karane baithe buddhijeeviyon aur raajanetaaon ke ek samooh men indiyan eksapres ke sampaadak ne ek badee dilachasp baat beparadaa kar dee. aap sab jaanate hee hain ki kaangres paartee ko lagabhag bahumat mil gayaa hai aur ye tay ho chukaa hai unake aur agalee sarakaar ke beech ab koee rodaa naheen hai.

isee baat par ho rahee chahachahaaton ke beech pranay roy ne ne kaangres ke prithveeraaj chauhaan ko gherate hue kahaa ki ab aap ke oopar vaam dalon kaa dabaav naheen hai aur isalie ab gahare aarthik sudhaar karane se peechhe hatane ke lie aap ke paas koee bahaanaa naheen hogaa.

prithveeraaj chauhaan kuchh is kee pudiyaa banaate usake pahale hee shekhar guptaa ne ati utsaah men uvaachaa ki kaangres ke andar tamaam saare klozet soshalist (chhipe hue samaajavaadee) hain jo gahare aarthik sudhaaron men rukaavat ban jaate hain. ullekhaneey hai ki isake thodaa pahale svayn raahul gaandhee gareebon ke hiton kee baat karate tee vee par dikhaaee die the. paroksh roop se yah aarop un par bhee thaa (haalaanki main is aarop se sahamat naheen hoon).

prachchhann samaajavaadee hone kee is tipppanee par je dee yoo ke en ke sinh ne ek bebaak baat kahee- agar kaangres ke bheetar klozet soshalist kee baat sahee hai to is kaa seedhaa arth yah hogaa ki aarthik sudhaaron kaa ejendaa kaangres kaa apanaa ejendaa naheen balki oopar se thopaa gayaa ejendaa hai. shekhar guptaa is ke javaab men chuppee saadh gae. magar kyaa ye baat sach naheen hai?

aakhir kis kaa ejendaa hai ye aarthik sudhaar kaa ejendaa? kaangres kaa to naheen hai. kyonki kaangres paartee to pichhale chunaav men kaangres kaa haath aam aadamee ke saath ke naare par sabase badee paatee ke roop men ubhar ke aaee thee. NREGA jaisee yojanaaon ko laagoo karane ke alaavaa kaangres ne gareeb aadamee ke lie kyaa kiyaa? kisaanon ke karze maaf kar die? is tarah ke qadam, maar ke aansoo ponchhane jaisee baaten hain.

maze kee baat yah hai ki NREGA tathaa any janahit kee yojanaaon ko laagoo karane ke lie vaam dalon ne hee un par dabaav banaayaa thaa. aaj haalat ye hai ki vaam dal haar gae aur kaangres vijayee huee hai.

main naheen jaanataa ki pragati aur aarthik khushahaalee ke lie kaun saa raastaa sahee raastaa hai. sambhav hai ki aarthik sudhaaron kaa raastaa hee dee gaee paristhitiyon men sabase kam buraa ho. magar mushkil ye hai ki kaangres ne use laagoo karane ke lie janaadesh naheen liyaa hai.

janaadesh kis baat kaa milaa hai yah kitane log theek-theek kah sakate hain? kitane logon ne kaangres, bhaajapaa aur any dalon kaa ghoshanaapatr padhaa hai? to aakhir kis aadhaar par log ek dal ko chunate hain aur doosare dal ko nakaar dete hain? sadak ban gaee ho, naalee saaf karaa dee gaee ho, bijalee jaanaa kam ho gayaa ho, in aadhaaron par nitish aur modee jaise netaa qaddaavar saabit ho rahe hain. jaan maal kee surakshaa kaa vaadaa karake laaloo aur mulaayam abhee tak musalamaanon se janaadesh ugaahate rahe hain. daliton kee izzat afzaaee ke savaal par maayaavatee dalit vot par paalathee maar ke jamee huee hain.

in sab aadhaarabhoot aur behad maulik savaalon men atakee hamaaree janataa se ye ummeed karanaa shaayad zyaadatee hai ki vah aarthik sudhaaron par janaadesh de? mere jaise padhe-likhe hone kaa bhram rakhane vaale log tak pooree shiddat se is vishay par apanee raay zaahir naheen kar sakate ardh-shikshit aam janataa kee baat bahut door kee hai.

fir aarthik sudhaar kis ke anumodan se laagoo kie jaa rahe hain? kisee ne aap se poochhaa? 1991 men narasinh raav aur manamohan sinh kee teem ne taatkaalik aarthik snkat se nibatane ek raastaa apanee zimmedaaree par tay kiyaa. jisakaa dabaav varld baink aur aaee em ef kaafee pahale se bhaarat sarakaar par banaae hue thaa. magar hamaaree samaajavaadee viraasat hamen us raaste par jaane se baraabar roke hue thee. snyog se vah faisalaa safal saabit huaa aur bhaarat aarthik pragati kee raah par chal nikalaa.

yahaan par yah ullekh karanaa gair-vaajib naheen hogaa ki manamohan sinh svayn bhaarat sarakaar kee naukaree karane ke pahale varld baink kee naukaree bajaa chuke hain.

main jaanataa hoon aur maanataa hoon ki aap har baat par bahumat kee raay lekar chalenge to kunen men gir jaaenge. tamaam aham faisale aap ko visheshajnyon ke vivek par chhodane hee honge. lekin jo visheshajng ye faisalaa le rahe hain ve aap ke hee hit ko dhyaan men rakhakar ye faisale kar rahe hain is baat kee kyaa gaarantee hai? ve ambaanee, kok, vaalamaart, aur monasainto ke hiton ko sarvopari naheen rakh rahe ye aap kaise jaanate hain?

kisee aham mauke par jab vidarbh ke kisaan aur monsainto ke hit takaraayenge to ye visheshajng monasainto kaa hit saadh kar aatmahatyaa karane vaale kisaan ko kuchh muaavazaa dene ke bajaay seedhe kisaan ke hit men faisalaa karenge yah kyaa aap poore vishvaas se kah sakate hain?

doosaree or aarthik sudhaaron kee yah samajh maanatee hai ki baazaar ke mukt vikaas se aam khushahaalee badhegee. agar sachamuch aisaa hai to poore vishv men baazaar ke mukt vikaas ke lambe daur ke baad aaj mandee aur maayoosee kyon hai? kyon aaj mukt hast se karz baantane vaale baink khud katoraa leke khade hain?

to in visheshajnyon kee samajh aur unakee pratibaddhataa donon par savaaliyaa nishaan hain. magar ham aur aap kuchh naheen kar sakate kyonki aise tamaam savaalon ke aadhaar par ham bhaarat desh ke log kisee dal ko janaadesh naheen dete. mainne svayn ne kaangres paartee ko vot diyaa hai.

kyonki main n to shree adavaanee ko desh ke pradhaanamntree ke bataur dekhanaa chaahataa thaa aur n hee shiv senaa yaa mahaaraashtr navanirmaan jaisee senaaon ke haathon aatataayit hone kaa ichchhuk thaa. ek vikalp mere paas samaajavaadee paartee ke ummeedavaar aboo aasim aazamee bhee the.. par ve kaise vikalp hain is par charchaa n hee karen to behatar hai. to mainne kaangres ke gurudaas kaamat ke naam par batan dabaa diyaa doosare kisee vikalp ke abhaav men.

aap ko yah sarakaar mubaarak ho! is ummeed ke saath ki kabhee vo samay bhee aaegaa em pee yaanee janataa ke pratinidhi snsad men qaanoon banaate samay apanee us janataa kaa hit-ahit bhee sochenge jisane unhe chun ke aayaa hai aur usake baad kabhee vo samay bhee aaegaa ki jab sarakaar aise aham maamalon ko laagoo karane ke pahale janataa se janaadesh legee.

ef tee aaee aaee men sarapat

pichhale hafte meree laghu film sarapat kaa film end televizan insteetyoot men pradarshan huaa. bhaaee kamal svaroop doosare varsh ke chhaatron ke lie ek varkashop kaa snyojan kar rahe the, usee ke ek hisse ke bataur sarapat bhee chhaatron ko dikhaaee gaee.

abhee tak sarapat doston-yaaron ko hee dikhaaee gaee thee. film kaa pahalaa saarvajanik mnch ef tee aaee aaee jaisaa pratishthit snsthaan banaa, yah mere lie garv kee baat hai. darshakon kee snkhyaa koee bahut badee naheen thee magar fir bhee anubhav sukhad thaa.




















film ke baad chhaatron se kuchh paricharchaa bhee huee jisamen unakee taraf se kuchh saarthak prashn aae aur mainne unakaa santoshajanak samaadhaan kiyaa. ek cheez mere lie zaroor seekhane kaa sabab banee – meraa parichay. hameshaa se hee main apane prati kuchh hichikichaayaa, sharmaayaa rahataa aayaa hoon. yah diqqat mujhe vahaan bhee pesh aaee.

mujhe hameshaa lagataa aayaa hai ki mainne jeevan men kuchh bhee batalaane yogy to naheen kiyaa ab tak. is film ko banaane ke baad se vah ehasaas kuchh jaataa rahaa hai. aur isalie ab sochaa hai ki is sharmindagee se chhutakaaraa paa kar ise alavidaa kahaa jaay. kyonki saarvajanik jeevan men log aap ke baare men sahaj roop se utsuk hote hain aur us kaa saral samaadhaan karanaa aap kee zimmedaaree hai usamen sharmindagee kee baadhaa naheen honee chaahiye.

aajakal tamaam film-utsavon men sarapat ko bhejane kee qavaayad bhee chal rahee hai. ve bhee ek daairektarz baayagraafee kee talab karate hain- lagabhag 100 shabdon men. yah ek achchhee kasarat hai agar koee karanaa chaahe- apane jeevan ko sau shabdon men sametanaa. vaise mere jaise vyakti ke lie kuchh mushkil naheen thaa jise lagataa rahaa ho ki jeevan men kuchh naheen kiyaa – sivaay is film ke.

vaise to kisee bhee cheez ke banane men tamaam cheezon kaa yogadaan hotaa hai. kuchh aisee jinake prati vyakti sajag hotaa hai aur tamaam aisee jo anajaane hee manushy ko prabhaavit karatee chalatee hain. meree is rachanaa yaatraa men bhee anekaanek cheezon kee bhoomikaa rahee hai, anajaanee cheezon kee to baat kaise kahoon, par jaanee huee cheezon men is blog kee bhoomikaa pramukh hai.

is blog par likhate hue mainne apane sarokaaron ko pahachaanaa, samajhaa, vikasit kiyaa aur apanee abhivyakti ko nikhaaraa hai. akele baithe hue sochane aur blog par likhane men bahut badaa antar ho jaataa hai- paathak kaa.

paathak ke astitv men aate hee fir aap jo likhate hain – apane man kee hee likhate hain – magar paathak ko kendr men rakhakar likhate hain. vah aap ke bheetar ek uddeshy kee rachanaa karataa hai aur ek oorjaa kaa snchaar karataa hai. apanee puraatan paramparaa ke anusaar paathak bhee ek devataa ho sakataa hai- jo aap ke bheetar ek sakaaraatmak parivartan karaane men saksham hai.

apane is nanhe se qadam ko uthaa paane men safal hone ke lie main aap sab kee bhoomikaa kaa satkaar karataa hoon aur aap kaa dhanyavaad karataa hoon.


* tasveer men snsthaan ke praadhyaapak v mere mitr ajay rainaa soochanaa patt par likhate hue.

unake jeevan kaa sab se dukhad din

ye netaa janataa ko kitanaa moorkh samajhate hain, n to isakee koee had hai aur n inakee makkaaree kee koee seemaa. bhootapoorv raamabhakt aur vartamaan mulaayam bhakt kalyaan sinh kaa kahanaa hai ki bhaajapaa ne unhe dhokhaa diyaa, unakee aankhon men dhool jhonkakar baabaree masjid giraa dee. vaastav men to ve musalamaanon ke sachche mitr hain.

is bayaan se mujhe barabas laal krishn adavaanee ke us bayaan kee yaad aa gaee jisamen ve faramaate hain ki 6 disambar 1992 unake jeevan kaa sab se dukhad din hai. adavaanee jee kee fitrat ke anusaar to yah bayaan bhee utanaa dhoortataapoorn hai jitanaa ke unake poorv chele kalyaan sinh kaa. par mujhe lagataa hai ki adavaanee saahab jhooth naheen bol rahe hain. vaaqaee vo din unake jeevan kaa sab se dukhad din ho sakataa hai jis din unakee sone kee murgee halaal kar dee gaee ho.

ye usee dukhad din kaa nateejaa hai ki aaj lagabhag bees saal baad jabaki ve qabr men pair latakaa kar baithe hain aur pradhaanamntree kee gaddee unake pahunch se door aur door hotee jaa rahee hai. janataa ko bahakaane ke lie unake paas ek muddaa bhee naheen; aur raam mandir to itanaa feekaa ho chukaa hai ki modee bhee usakaa zikr karane se qataraa rahe hain.

agar baabaree masjid naheen giree hotee to aaj bhee vo vivaadit sthal par vaheen shobhaayamaan hotee jahaan aajakal raamalalaa viraajamaan hain. aur baar-baar muslim aakramanakaariyon ke moortibhnjak itihaas kee duhaaee de-de kar hinduon ke khoon ko khaulaayaa jaa rahaa hotaa. hindoo aur musalamaanon ke beech vaimanasy ko roz bhadakaayaa jaa rahaa hotaa. aaj vo kuchh sambhav naheen kyonki baabaree masjid ke gir jaane se hinduon kee pratishodh kee bhookh pooree ho gaee.. magar musalamaanon ke bheetar jaag gaee. jisakaa pramaan hamen mumbaee seeriyal bam visfot jaisee ghatanaaon men milaa.

yahaan ek baat saaf kar denaa aur zarooree hai. mere jaise aastik magar gair-karmakaandee hindoo ke lie n to kisee mandir kaa koee arth hai aur n kisee masjid men koee shraddhaa. mujhe baabaree masjid ke vahaan khade rahane se n to koee sukoon milataa thaa aur n hee usake girane se mere maanasik snsaar men koee abhaav aa gayaa hai.

is desh ke bahut saare sekularapnthee is baat se bhaajapaa aur vihip se khauriyaaye nazar aate hain ki unhone ek aitihaasik mahatv kee imaarat ko giraa diyaa! is desh men hazaaron aise aitihaasik sthal hain jahaan jaa kar mootane men sekularapnthiyon ko koee gurez naheen hogaa. aam janataa vaqt padane par usakee eent ukhaad kar kriket kaa viket banaane men istemaal karatee rahee hain. mujhe unakee is puraatatv-priyataa men raajaneeti kee boo aatee hai.

mujhe is tarah ke shuddh, ruksh puraatatvee itihaas men koee aasthaa naheen; mere lie vo aitihaasik smritiyaan adhik mahtv kee hain jo manushy ke maanas men qaid rahatee hain. vahee smritiyon jinake naasoor men ungaliyaan ghusaa kar laal krishn adavaanee ne is desh men nafarat kee raajaneetik fasal kaatee hai.

ek aur doosaree baat saaf karane kee zaroorat hai ki yah sach naheen hai ki is desh men hindoo aur musalamaan hameshaa shaantipoorn dhng se rahate aae hain. sekular itihaasakaar sirf ek saajhee snskriti kee chhavi ko hee ubhaarate aaye hain aise tamaam tathyon par paradaa daalakar jo unakee is nishpatti ke virodh men hon. saajhee snskriti kee baat pooree tarah galat naheen hai magar vo adhooraa sach hai. usakaa poorak sach - ek aapasee sngharsh kaa sach aur samay-samay par hinduon ke daman kaa sach hai.

baabaree masjid raam mandir ko todakar banee thee yaa naheen is baat kaa pramaan maang kar ham adavaanee jaise maqkaar raajaneetijnyon ke qadam kuchh der ke lie to rok sakate hain magar hindoo maanas men dabee, mandiron ke tode jaane kee us jaateey smriti ko met naheen sakate jo niraadhaar naheen hai. khud muslim itihaasakaaron ne aise abhiyaano kaa vistaar se varnan kiyaa hai.

hamaare saamane do tarah ke jhoothe itihaas rakhe jaate hain. ek itihaas samaaj men bhaaeechaaraa banaa rahe isalie jhooth bolataa hai to doosaraa apane paraajay bodh ko ghataane ke lie aur samaaj men saampradaayik tanaav badhaane ke lie jhooth bolataa hai. koee saty kee shakti men yaqeen naheen karanaa chaahataa aur n hee samay ke svaabhaavik pravaah se jaateey smritiyon ke sulajh jaane men vishvaas rakhanaa chaahataa hai. ek unhe nakaarataa hai to doosaraa aag se aag bujhaanaa chaahataa hai.

ek svasth samaaj ke lie usake vyakti ko paraajayabodh se mukt honaa chaahiye. to kyaa har hindoo ko videshee aakramanakaariyon ke saath sngharsh men apane poorvajon kee haar kaa badalaa apane nirdosh padosiyon se lenaa chaahiye? aisee soch aur krity ko badhaavaa denaa neechataa, kaayarataa aur aparaadh hai. hinduon ke naam par raajaneeti karane vaale dal yahee karate rahe hain.

rath-yaatraa nikaal kar is desh ke gaanv-gaanv men laalakrishn aadavaanee ne jo dnge kaa maahaul taiyaar kiyaa thaa, usamen hazaaron hindoo-musalamaanon kee jaane gaeen. main usake lie vyaktigat taur par laal krishn adavaanee ko zimmedaar maanataa hoon. meraa savaal hai ki unhe baabaree masjid se sambandhit har dnge men honee vaalee maut ke lie aparaadhee kyon naheen maanaa jaay?

kaise ek liberahaan inkvaayaree kameeshan mahaz unake ek akele bayaan par baree kar detaa hai ki vo mere jeevan kaa sab se dukhad din thaa? kyaa unhe dikhataa naheen ki vo shakhs gaanv-gaanv nagar-nagar aag lagaataa aa rahaa thaa? aur jab masjid gir gaee to rone lagaa ki hamen kyaa pataa ki kaise gir gaee? meree samajh men to vahee kendreey roop se aparaadhee hain.

mainne pahale bhee kahaa ki mujhe masjid girane se koee farak naheen padaa. aur jahaan baabaree masjid thee vahaan raam mandir banane men bhee meree koee ruchi hai. baavajood isake ki main maanataa hoon ki raam ne usee ayodhyaa men janm liyaa thaa jo desh men samudaayon ke beech kaa klesh kaa kaaran banee huee hai. mujhe raam men shraddhaa hai magar mere raam apane bhakton ke haday men rahate hain kisee haaeelee sekyord tent men naheen.

fir bhee agar kabhee vahaan mandir ban gayaa to mujhe takaleef bhee n hogee. lekin us ke banane se agar mere musalamaan doston ke man men koee paraajay-bhaav ghar karataa hai, koee chot lagatee hai to aisaa mandir mujhe saat janmon tak bhee sveekaary n hogaa. mandir eeshvar se aadamee kaa yog karaane ke abhipraay se banataa hai, aadamee kaa aadamee se jo vair karaae vo mandir aadamee ko eeshvar se milaa degaa is dhokhe men jo rahanaa chaahataa hai to rahe, main itanaa abodh naheen.

aur jo log is dhokhe men hain ki bhaajapaa yaa adavaanee kabhee koee mandir banavaa denge to jaag jaayen, raam kaa naam lekar raajaneetik laabh uthaane vaale adavaanee aur kalyaan sinh jaise log mandir banaane men naheen masjid giraane men yaqeen rakhate hain. aur fir masjid giraa kar ek apane ko dukhee bataane lagate hain aur doosare kahate hain ki unake saath dhokhaa huaa hai. hairat hai ki desh ke hindoo log in par bharosaa karate hain aur musalamaan mulaayam jaise dhongiyon par jo ek taraf to in raakshason se unhe bachaane kaa vaadaa karate hain aur fir vot ke laalach men un ke pair chhoo kar dharm nirapekshataa kaa pramaan patr bhee pakadaa aate hain.

ye netaa to dhany hain hee, hamaare desh kee janataa bhee dhany hai.