dabe paanva

sherajng kee shaanadaar kitaab 'main ghumakkad vanon kaa' padhne ke baad unakee doosaree kitaabon ko padhne kee bhookh lie-lie jab main mitr bodhi ke ghar pahunchaa to meree najr unake khjaane ke ek kone men dabee aur doosaree kitaabon ke bojh se karaah rahee 'dabe paanv' par padee. ye aitihaasik lekhak vrindaavanalaal varmaa ke shikaar snsmaranon ko muajjamaa hai. bodhi ne udaarataa se kitaab kavar chadhaakar mere havaale kar dee aur mainne to kitaab paaee gaanth gathiyaaee.

kitaab men varmaa jee ne bundelakhand ke jhaansee, gvaaliyar, orchhaa aadi ilaakon ke jngalon men unake shikaar ke shagl kee teepen likhee hain. in teepon men syaar, kharahe-kharagosh, mor, neelaknth, teetar, bhatateetar, vanamurgee, hariyal, chandool,laalamuniyaan, saaras, panadubbiyaan, patokhiyaan, titaharee, magar, aur jalakuttaa jaise jeevon ke baare men to baat hotee hee chalatee hai. lekin mukhy taur par is kitaab men jngal ke bade jaanavar chinkaaraa, hiran, cheetal, tenduaa, kaalaa tenduaa, cheetaa, lakadbhaggaa, kheesadaar suar, reechh, saanbhar, neelagaay, naahar yaa baagh yaa sher, sinh, jngalee kutte(sunaa kutte) aur bhediye ke vyaktitv, aapasee antar aur vyavahaar kee tamaam anamol jaanakaariyaan hain- jaise bhaaloo niraa baharaa hotaa hai aur najr kaa kamajor hotaa hai usakaa ekamaatr sahaaraa usakee naak hotee hai. jab kabhee kisee aadamee roopee khtare ko achaanak vo apane paas paa jaataa hai to ghabaraakar us par hamalaa kar baithataa hai. svabhaav se vo bandaron kee hee tarah moolath shaakaahaaree hai. yaa fir lakadbhaggaa maukaa milane par apane hee bhaaee-bandhuon kaa bhakshan kar daalate hain. hinsr pashuon men tenduaa sabase adhik dheeth hotaa hai jabaki snsaar kaa sabase raftaar vaalaa praanee cheetaa,billee kee tarah paalatoo banaayaa jaa sakataa hai. haalaanki cheetaa ab hamaare desh se lupt ho chukaa hai. is tarah kee jaanakaariyon ke alaavaa kitaab men varmaa jee ke shikaar ke dilachasp anubhav hain.

is kitaab ko padhne se jo tasveer jehan men khinchatee hai usase samajh aataa hai ki aaj kee taareekh men vanyajeevan kee haani kee is bhaayanak traasadee ke lie jimmedaar do baate hain-

1) manushy kee badhtee aabaadee ke kaaran krishi bhoomi kaa hone vaalaa lagaataar vistaar. jisake chalate jngal ke jaanavar aur manushy seedhe sngharsh men fns gae. kitaab men baar-baar yah baat aatee hai ki cheetal, chinkaaraa, suar,hiran jaise jaanavar kisaanon khet men ghusakar fsal kaa sampoorn vinaash kar dete hain. jisake chalate kisaan yaa to svayn maukaa milane par in jeevon kee laathee-dandon se peet-peetakar hatyaa kar daalate hain yaa fir kisee bandookadhaaree shikaaree ke shikaar yajng men bharapoor sahaayataa karake in jaanavaron ke samool naash men apanee yogadaan karate hain. aur doosaree vajah hai..

2) bandook ke roop men ek aisaa bhayaanak aavishkaar jisane aadamee aur shesh praaniyon ke beech ke sameekaran ko pooree tarah se ekatarafaa banaa diyaa hai. teer kee maar aur gati se jaanavar fir bhee mukaabalaa kar sakataa thaa par golee kee maar aur gati ke aage jngal kaa har pashu nireeh aur bebas hai. parinaam aap dekh hee rahe hain- nnge v sapaat maidaan jisamen aadamee ke sivaa doosaraa jaanavar khojanaa mushkil.

kitaab kaa ek aur dilachasp pahaloo hai: kyonki kitaab 64 saal pahale 1957 men chhapee aur usake bhee kaafee pahale tukadon-tukadon men likhee huee hai, isalie usakee bhaashaa thodee alag hai aur usamen kuchh aise shabd aur prayog milate hain jo aajakal pooree tarah se chalan se baahar ho gae hain. masalan-

kalol (kilol)

parahaa (pagahaa?)

lagaan (lagaam?)

tehunee (kehunee)

paramaa (prathamaa tithi)

thiyaa

khees (daant)

dhee (dheeh)

a/aagot (aage kee ot)

bharakaa (gaddhaa)

daang (pahaad kaa kinaaraa)

jhor( jhaunr, jhaadee)

bagar (pashu samooh)

dhunkaaee / dhoonkaa (chhipakar ghaat lagaanaa)

thapadaar (thap kee aavaaj karane vaalaa)

murakanaa (lachak kar mud jaanaa)

dhabuaa (kheton ke oopar machaan kaa chhappar)

dah( nadee kaa sabase gaharaa bindu)

tauriyaa (chhotaa teelaa)

fureroo (shareer ko tharatharaanaa, knpaknpee lenaa)

aur kaee shabd aise bhee milate hain jo shabdakoshon men bhee naheen milate- inake ek soochee main yahaan de rahaa hoon-:

tifnsaa/tifnsee (ghadaa rakhane kee tipaaee)

jhidde (jhatake, dhakke)

khurakhund

chhareree

gaayaraa (sher aadi kaa kisee jaanavar ko maarakar baad men khaane ke lie chhod kar chale jaanaa)

tohataap

chhaunh (kharee chhauhon vaalaa sher)

raanjh (ek naale men raanjh ke neeche)

jhaans (jhaans ke neeche chhote naale men)

takaare (edee se ghutane tak pahanane kaa jootaa)

chul (vahaan tendue kee chul thee)

biroree (shikaar kaa ek prakaar, jab ber falate hon)

***

[kitaab men ek aur badaa dilachasp vaakyaa hai jab varmaa jee apane saathiyon ke saath jngal men daal-chaaval kee khichadee banaate hain aur jalaa baithate hain. jo aadivaasee in shaharee shikaariyon kee sahaayataa ke lie unake saath maujood thaa vo apanee khichadee alag banaa kar maje se khaataa hai kyonki vo aadivaasiyon men purohit (begaa kahalaane vaalaa)kaa kaam karane vaalaa hai aur kisee kaa chhuaa naheen khaataa. :) ]

* ek teesaree kitaab 'negal' bhee padh rahaa hoon. baabaa aamte ke putr prakaash aamte dvaaraa anaath ho gae jngalee jaanavaron ke paalane ke anubhav par aadhaarit ye bhee badee pyaaree aur nyaaree kitaab hai. unake sahayogee vilaas manohar ne likhee hai aur neshanal buk trast ne chhaapee hai.