kaisaa thaa vah man - aap padh kar dekhen!

ek kitaab, upanyaas, vah bhee ek naaree kaa likhaa. padhate samay bahut se prashn man men aate hain - kaise likhatee hain upanyaas ve. kitanaa vaastavikataa hotee hai, kitanaa mithak. kitanee komalataa, kitanee sensitivitee, kitanaa jabaree kee naareevaaditaa aur kitanaa abhijaaty yukt chhadm. chaahe shivaanee ho, chaahe mahaashvetaa devee. chaahe arundhati roy hon. padhate samay in sab binduon par lekhan ko tolataa rahataa hai man. aur bahudhaa adhapadhee rah jaatee hai pustak.

par yah upanyaas - kaisaa thaa vah man - to lagabhag nirntar padh gayaa main.

ek chhote shahar kee ladakee, ek madhyavitt parivaar ke ladake se vyaahee jaatee hai. ladakaa ban gayaa hai afasar. shaayad rel kaa. aur vah ab us afasar ke saath jagah jagah rahatee hai. bade bngale, unamen akelaa pan aur unamen narsaree raaims aur baal kathaayen bunatee yah mahilaa. kuchh alag see hai yah mahilaa.

saamaanyat: maine afasaron kee beeviyon ko dekhaa hai. klab aur mahilaa samiti men apane aap ko projekt karane kee udhedabun men lipt. ek doosare kee buraaee aur apane ko sabhy bataane kee hod men jindagee gnvaane vaalee aurate. teej tyauhaar men deshaj samajh se anajaan ek ajeeb saa afasaraapan dikhaatee auraten. bekaar see auraten.

karachhanaa kee gngaa

maine dekhaa naheen karachhanaa kee gngaa ko. chh maheene se manasoobe baandh rahaa hoon. ek din yoon hee nikaloongaa. sabere kee paseejar se. karachhanaa utaroongaa. karachhanaa steshan ke steshan maastar saahab shaayad kisee portar ko saath kar den. par shaayad vah bhee theek naheen ki apanee saahabee aaidentitee jaahir karoon!

“rudr” kaashikey par pratham teep

apanee moorkhataa par hnsee aatee hai. kuchh vaisaa huaa – chhoraa bagal men dhundhaaee shahar men!

raahul sinh jee kee tippanee thee talloo vaalee post par -

aparigrahee tal‍loo ne jeevan ke sat‍y kaa sndhaan kar liyaa hai aur aapane tal‍loo kaa, badhaaee. jagadev puree jee se aapakee mulaakaat hotee rahe. ab aapase k‍yaa kahen ki ek the shiv prasaad mishr "roodr" kaashikey.

hindee men pustak anuvaad kee seemaayen

do pustaken main padh rahaa hoon. lagabhag padh lee hain. ve kuchh post karane kee khurak paidaa kar rahee hain.

khurak shaayad pnjaabee shabd hai. jisakaa samaanaarthee itching yaa talab hogaa.

pahalee pustak hai shiv prasaad mishr “rudr” kaashikey jee kee – bahatee gngaa. jise padhane kee preranaa raahul sinh jee se milee. thikaanaa bataayaa bodhisattv jee ne. vilakshan pustak! isake baare men baad men kahoongaa. aage kisee post men.

gautam shnkar bainarjee

us din shiv kumaar mishr ne aashvin saanghee kee ek pustak ke baare men likhaa, jisamen itihaas aur romaanch kaa jabaradast vitaan hai. saanghee peshevar lekhak naheen, vyavasaayee hain.

kuchh din pahale raajeev ojhaa ne aaee-nekst men hindee blogars ke baare men likhaa jo peshevar lekhak naheen hain – koee kampyootar visheshajng hai, koee vidyut abhiyntaa-kam-relagaadee prabandhak, koee chaartard akaauntent, kaee vaijnyaanik, injeeniyar, prabandhak aur teknokret hain. aur bakaul raajeev top blogars hain.

kyaa hai in vyaktiyon men?

bimb, upamaa aur n jaane kyaa!?

---

kal sukul kahe ki falaanee post dekhen, usamen bimb hai, upamaa hai, saahitt hai, nok jhonk hai.

ham dekhe. saahitt jo hai so dher naheen bujhaataa. bujhaataa to blog likhate? badaa badaa saahitt - granth likhate. dher paisaa peetate. pichhalaggoo banaate!

shahareekaran aur bloging ke saamy

hindee blogaree ke baare men "sapaat hote vishv" (The World is Flat) se utanaa saamy naheen milataa, jitanaa shahareekaran ke apane aas paas dikh rahe finominaa yaa arban rivolyooshan par kitaab padhne se milataa hai. jeb broogamaan kee linkit pustak aap padhen to jaisaa vibhinn deshon men pichhale kaee dashakon men shahareekaran ke udaaharan milenge, vaisaa hee hindee blogaree men hotaa prateet hotaa hai.

aap apane aas paas arbanaaijeshan dekhen. bambaee men maraathee maanoos kaa tark le kar shaharee banane kee jugat lagaate logon ko baahar rakhane kaa yatn ho rahaa hai. aastreliyaayee log bhaarateeyon ko yen-ken-prakaren dabolanaa chaahate hain. blaik ko gore isee tarah se ghetto banaane ko majaboor karate rahe hain pichhalee shatee men. is prakriyaa men lokal polees, myoonisipaalitee, netaa aur kaanoona; sab rol adaa karate hain sabarbiyaa ko kone men dhakelane men. unako milatee hai sabase raddee jameen, shaharee suvidhaaon kaa abhaav, dhaaraavee jaisee dashaa. aur unamen jeevat hotaa hai un paristhitiyon kaa bhee prayog kar aage badhne kaa. ve ardh-snskrit bhaashaa, hinsaa aur chhote aparaadhon se parahej naheen karate. isake binaa chaaraa naheen.

frjee kaam (Fake Work)

---

mere mitr aur mere pashchim madhy relave ke kaauntarapaart shree saiyyad nishaat alee ne mujhe fek vark (Fake Work) naamak pustak ke baare men bataayaa hai.

ham sab bahut vyast hain. roj pahaad dhakel rahe hain. par ant men kyaa paate hain? nishaat jee ne jo bataayaa, vah ahasaas hamen jamaane se hai. par usakee kitaab men frjee kaam kee charchaa aur usakee jagah asalee kaam karane kee stretejee kee baat hai; yah padhne kaa man ho rahaa hai.

aap to fek vark kee saait dekhen. usamen ek kathaa dee gayee hai frjee kaam ko samajhaane ko -

titiharee

---

titiharee yaa kuraree nity kee milane vaalee pakshee hai. mujhe maalum hai ki gngaa tat par vah meraa aanaa pasand naheen karatee. ret men ande detee hai. jab auron ke banaaye raaste se itar chalane kaa prayaas karataa hoon - aur koee bhee khabtee manushy karataa hai - tab titiharee ko lagataa hai ki usake ande hee churaane aa rahaa hoon.

jalavaayu parivartan - kahaan kitanaa?

---

tim fleneree kee pustak - "d vedar mekars" achchhee kitaab hai paryaavaran men ho rahe badalaavon ko samajhane jaanane ke liye. teen sau pejon kee is kitaab kaa hindee men anuvaad yaa vivaran upalabdh hai yaa naheen, main naheen jaanataa.

ek vriddh kaa blog?

---

sundaralaal bahugunaa kahate hain ki unakee jindagee ke dauraan hee gngaa men paanee aadhaa ho gayaa. akhabaar men unakee foto men san jaise safed daadhee moochhon vaalaa aadamee hai. main bahugunaa ko cheenhataa hoon. par ve ab bahut boodhe lagate hain chitr men. ve chipako andolan ke chakkar men akhabaar men aate the. aur main unhe ek jabaree vichaar thelak (thought pusher) samajhataa thaa. kaalaantar men unake prati ijjat badh gayee – vaise hee jaise apane ko main kuchh kaam kaa samajhane lagaa!

main akhabaar dekhataa hoon. udate sooaron kaa aatnk aur saundary kaa damakataa roop - yahee deekhataa hai. main shaam ko fort eriyaa men jaataa hoon, futapaath par kitaaben chhaanane. munh par maask lagaaye yuvak-yuvatiyon ko dekhataa hoon. main sochataa hoon ki samay jinake saath hai ve bhay men kyon hain? usake baad fort eriyaa, nareeman pvoint aur chachaget men maask lagaaye boodhe khojataa hoon - mujhe milate naheen.

achaanak main dekhataa hoon ki main bhee thelane lagaa hoon gngaa maaee ko lekar. aur mujhe naheen lagataa ki yah vishay chhod aajakal kee filmee heeroinon yaa aaitam garlon par likhane lagoongaa. agar gngaa maaee par kahanaa puraniyaapan kee nishaanee hai, to kyaa main paryaapt vriddhatv odh chukaa hoon? bebaakee se kahoon to ek star ke budhaape men apanaa vyaktitv “kemoflaaj” (avagunthit) karanaa mujhe majaa dene lagaa hai.

jaisee tippaniyaan mil rahee hain, unapar dhyaan den - aravind mishr jee mujhe vairaajng kee or mudaa bataate hain – ve ishaaraa karatee hain ki pandit jnyaanadatt paande, thodaa hindee angrejee jod tod kar likh bhale rahe ho tuma; par moolat: gaye ho sathiyaa.

isake alaavaa ye javaan log chachchaa, kakkaa bataaye chale jaa rahe hain. shukr hai kisee mahilaa ne abhee tak aisaa naheen kahaa varnaa jim jvaain kar vajan kam karanaa aur feshiyal masaaj kaa atirikt kharchaa vahan karanaa bajat men shaamil ho jaaye. aur us bajat ko meree patnee kadaapi senkshan naheen dengee, vaise hee jaise ek kodal laaif ke baad kisee vaigan ke ovarahol par paisaa kharch naheen kiyaa jaataa!

mahaakavi keshav kee sthiti samajh men aatee hai jinhe chhoriyaan baabaa kah kah chalee jaa rahee theen. mujhe aashaa hai ki girijesh raav aur krishn mohan mishr jaise javaan yah ishaaraa naheen kar rahe ki bahut ho gayaa ankal jee, ab dukaan band karo!

is samay lambee baithakon aur bhaarateey rel ke maal yaataayaat men badhotaree kee stretejee kee soch se sntript ho chukaa hai shareer-man. do din kee badee baithak ke liye yaatraa khalane lagee hai. badaa achchhaa ho jab ye sab baithaken telee-konfresing se hone lagen.

jab savere yah post khulegee to vaapasee kee meree gaadee taaptee-narmadaa ke aasapaas hogee. meree smriti men jalagaanv kee kapaas mandee men kapaas kaa dher aa rahaa hai jo maine nau saal pahale dekhaa thaa!

(mahaanagaree ekspres ke rek plesament kee prateekshaa men 13 agast kee raat men mumbaee veetee steshan ke rest haaus se thelee gaee post.)

---

@@@@@@@

---

yaatraa men tippanee nirvahan dharm

(yah post maine 12 agast kee savere pablish karane ko likhee thee. par pablish naheen kiyaa kyon ki isake folo-apa/maadareshan ke liye samay n nikalataa. ab ise dileet karane kee bajaay saath men natthee kar de rahaa hoon.)

---

jab main uthaa to din shuroo ho gayaa thaa. ek steshan ke paas paanee bhar rahe the log.

maine yaatraa men chalataaoo mobaail kanekshan se apanee post banaane aur pablish karane kaa kaam safalataa se kar liyaa. kuchh tippaniyaan bhee dekh-pablish kar leen. any logon ke blog padhanaa aur tippanee karanaa kuchh kathin kaam hai. panne khulate hee naheen aur unhen khol-padh kar tippanee karanaa asnbhav hai yaatraa men aate-jaate intaranet kanekshan se.

kaise kiyaa jaa sakataa hai? mere vichaar se ek bade jnkshan steshan par jab aapakee gaadee rukee ho; googal geeyars ke maadhyam se apanaa googal reedars aof laain istemaal ke liye daaunalod kar lenaa chaahiye. usamen chitr naheen aa paate aur agar log apanee pooree feed naheen dete to padhane men pooraa naheen aa paataa. par fir bhee paryaapt andaaj lag jaataa hai ki log kyaa kah rahe hain.

aur tab itmeenaan se googal reedar men aofalaain post padh kar ek post anoop shukl kee chiththaa-charchaa ke formet men likh-pablish kar tippanee-nirvahan-dharm kaa paalan kar sakate hain. poston ko link dene men kuchh jhnjhat ho sakataa hai – jab ve feedbarnar ke maadhyam se milatee hon. par fir bhee theekathaak kaam ho sakataa hai.

dekhaa jaaye.

(vaise kal (12 agast) mere liye bahut vyast din hai. lihaajaa ise post n karanaa hee upayukt hogaa.)

---

maan baap ek aisaa ghanaa ped hotaa hai jis kee chhaav naseeb vaalo ko milatee hai, raaj bhaatiyaa jee se asahamat hone kaa prashn naheen. poot kupoot hotaa hai, maataa kumaataa naheen hotee. unako huye maatrishok par snvedanaa.

rnjan jee ne skaaee aur metro kee tulanaa kee hai. ant men vot dene ko naheen kahaa. anyathaa main metro ko detaa. metro ke ee. shreedharan kisee jamaane men mere mahaaprabandhak rah chuke hain – pashchim relave men. aur main unase bahut prabhaavit hoon.

snjeet tripaathee raajaneeti men jude logon ke samriddh hone kee baat kahate hain. mujhe bhee lagataa hai raajaneeti traaee karanee chaahiye thee. yah avashy hai ki meraa ee.kyoo. (imoshanal koshent) us kaam ke star kaa naheen hai.

paryaavaran par kalam men jataaee chintaa bahut jaayaj hai. aur meraa mat hai ki is vishay par hindee men bahut kam likhaa jaa rahaa hai.

aravind mishr jee aabhaasee duniyaan ke vishay men vichaar vyakt karate hain ki maanaveeyataa kaa ksharan hogaa isase. meraa apanaa udaaharan hai ki is varchual duniyaan ke chalate main bahu aayaamee dekh-padh-abhivyakt kar rahaa hoon. yah to aujaar hai – prayog aasuree bhee sambhav hai aur daiveey bhee.

sngeetaa puree jee mausam aur gatyaatmak jyotish kee baat karatee hain. hamen abhee dono hee pahelee lagate hain!

taaoo kee saaptaahik patrikaa men unakaa foto naheen sameer laal jee kaa jaroor dikhataa hai!

seebeeaaee ke paas pille hee naheen bahut kuchh hotaa hai. ech.em.vee. kaa rikaard bajaate hain pille! – kaajal kumaar ke kaartoon par rispons!

renu shailendr aur pavaee lek – kabhee pavaee lek gayaa naheen. kaash aaeeaaeetee mumbaee men padhaa hotaa! sateesh pncham bahut keematee blogar hain!

vivek rastogee jee se poorn sahamati maataa-pitaa ke vishay men jo unhone kahaa.

girijesh raav ko padhate samay faneeshvar naath renu kee yaad aatee hai. kitanee sashakt hai lekhanee. bas yah hai ki post ke aakaar men simatatee naheen.

mehanat ke liye ho gar taiyaar, to chalo .
ek thaan lee hai jab, to usee raah par badho --- jab aashaa jogalekar jee yah kahatee hain to bahut yuvaa prateet hotee hain. umr kaa andaaj karen.

sunaamee vah adhyaay hai jisakee soch mujhe apanee nishkriyataa par khed hotaa hai. mujhe pooree sahaanubhooti thee, par kiyaa kuchh naheen. tanakhvaah se kuchh kat gayaa thaa, bas. dinesh raay dvivedee jee kee post par kavitaa padh kar vahee yaad ho aayaa.

snjay vyaas ek pyaaree kalam ke maalik hain. paark par likhate ve jo gaharaaee dikhaate hain post men , vah atyant prashnsaneey hai.

main jaaree rakh sakataa hoon, par chalatee tren ke jhatakon men likhane kee apanee seemaa hai! umr se jod sakate hain is seemaa ko aap.

aashaa hai shiv kumaar mishr kaa baik pen kam hogaa. likhaa naheen unhone kuchh. aur do javaan logon kee kalam se sneh hotaa hai – ye bahut naee umr kaa likhate hain – kush aur anil kaant

---

mngal aur tilngee

---

maine usakaa naam naheen poochhaa. “hatu re” vaalee post par log lajaa rahe the tiperate, par krishn mohan ne us paatr ko sahee cheenhaa – raagadarabaaree kaa mngaladaas urf saneecharaa. nayaa diyaa naam – sateesh pncham jee kaa; “jiyaalaal” bhee uttamottam hai!

mngal mahatvapoorn charitr hai raagadarabaaree kaa. aap us pustak kee sanicharaa ke bagair kalpanaa naheen kar sakate. aur meree “hatu re” vaalee post ke is paatr ko mere vyaktitv ke krishn paksh kaa fasaad maanane vaale maanate rahen – usakee kyaa keyar karoon! keyar karate rahate to bane rahate ghunnaa!

khair, “mngaladaas” pun: mil gayaa. is baar apane sthaan par baithe naheen; kachhaar men sambhavat: nipataan ke baad laut rahaa thaa. ek kaale rng kaa kutaa daud kar usake paas gayaa. mngal daas vaheen baith gayaa. kuttaa usake paas let usase khelane lagaa. mngal ne kutte kaa naam bataayaa – tilngee!

bade itmeenaan se mngal ne vaheen baithe baithe beedee sulagaaee. tilngee khelataa rahaa usase to vah bolaa – ek daaeen ekare nakiyaa men chhuaai dehe rahe beedee (ek baar tilngee kee naak men chhuaa dee thee maine beedee)!

mngal se log jyaadaa baatacheet naheen karate. ghaat par log takhte par baithate hain yaa seedhiyon par. vah alag thalag jameen par baithaa milataa hai. maine paayaa hai ki log bahudhaa usake kahe kaa javaab naheen dete. vah khnkhaarataa, datuan karataa yaa beedee peetaa paayaa jaataa hai. par tilngee aur usakee prakaar ke any kutte aur bakariyaan bahut hile mile hain usase. sambhavat sabhee ke naam rakhe hon usane.

maine usase baat kee to vah badaa asahaj lag rahaa thaa – baar baar poochh rahaa thaa ki foto kyon kheench rahe hain? (foto kaahe ghaeenchat hayen; laee jaaee k othaa men debyaa kaa – foto kyon kheench rahe hain, le jaa kar usamen – akhabaar men – denge kyaa?) shaayad isase bhee asahaj thaa ki main usase baat kar rahaa hoon.

fir kabhee “mngal” kaa naam bhee poochhoongaa. abhee aap chhotaa saa veediyo dekhen. isamen mngal kee naisargik bhaashaa kaa namoonaa bhee hai!

---

agale roj kaa apadet:

pandaajee ne “mngal” ke baare men bataayaa. naam hai javahir laal. yahaan ghar duaar, parijan naheen hain. chhotaa motaa kaam kar gujaaraa karataa hai. yaheen rahataa hai. moolat: machhaleeshahar (jaunapur ke paas) kaa rahane vaalaa hai.

javaahir laal us samay paas men baithaa mukhaaree kar rahaa thaa. usase poochhaa tilngee kahaan hai. bataayaa – “khelat hoye saar (khelataa hogaa saalaa)”. aur bhee kutton ke naam rakhe hain – kisee kaa nekur kisee kaa kajaree. bakaree kaa naam naheen rakhaa.

---

agale chaar paanch din yaatraa par rahoongaa. lihaajaa gngaa jee aur unake parivesh se mukti milee rahegee aapako! aur mujhe khed hai ki mere tippanee modareshan men bhee deree sambhav hai.

---

amritalaal vegad uvaach

---

pichhalee tnkiyaatik post par sameer laal tipere: ab aap kah rahe hain, to theeke kah rahe honge. theeke to kah rahe the – ham naheen, sameeralaal. itanee jyaadaa posten nipataate hain to soshiyo-politikalee karekt tiperanaa unhee se seekhanaa chaahiye! (koee vyng intended naheen. kal unakaa janmadin thaa, bahut bahut badhaaee!)

asal men hamaare jaisaa koee chimirakhee daas lekhan ke hat-utsaah par kahe to yah tarakaaoo tippanee hee banatee hai. anyathaa aap saundary kee nadee narmadaa vaale amritalaal vegad jee ko padhen (yah unhonne binaa durghatanaa ke shoolapaaneshvar kee jhaadee paar kar lene ke baad likhaa hai):

... lekin ab to khataraa nikal gayaa. kitaab (narmadaa kee parikramaa par) ek n ek din pooree ho hee jaayegee. tab kyaa hogaa?

avval to mujhe prakaashak naheen milegaa. prakaashak mil gayaa to graahak naheen milegaa. graahak milaa to paathak naheen milegaa. agar main kahoon ki yah yaatraa svaant: sukhaay kar rahaa hoon, to vah ardhasaty hogaa. main chaahataa hoon ki jo sukh mujhe mil rahaa hai vah doosaron ko bhee mile. main "svaant: sukhaay" bhee chal rahaa hoon to "bahujan sukhaay" bhee chal rahaa hoon. to kahaan hai yah bahujan?

tee.vee. ke saamane. tee.vee. aur veediyo kaiset ke is yug (varsh 1992) men kitaab padhane kee jahamat bhalaa kaun uthaayegaa! tee.vee. khol do aur kursee men pasar jaao.

kitaab ko faink do. adhik se adhik "divngat pustak” kee smriti men ekaadh marsiyaa padh do aur fir use bhool jaao. yah hai pustak kee niyati. achchhee tarah jaanataa hoon, fir bhee is kitaab ke liye khoon paseenaa ek kar rahaa hoon.

moorkh!

kitaab san 1992 men fir bhee fannekhaan cheej thee. blog to 2009 men bulabulaa hai saabun kaa! bas van aaftar adar fulaaye jaao bulabule saabun ke!

kontreriyan vichaar: blog to fir bhee baithe-thaale kee cheej hai. diye jaayen posten. par kitaab chhapaane ko (paathak kee killat ke yug men bhee) kaahe bauraaye rahate hain log! itanaa kaagad kee barabaadee - jo antat: deemak ke hisse hee aanee hai.

main jaataa hoon hveelars kee dukaan par aur binaa khareede chalaa aataa hoon. kaauntar par baithaa aadamee mujhe chirakut samajh rahaa hogaa aur main samajhataa hoon ki maine paise bachaa liye. dono hee sahee hain. isee tarah bloging ko le kar kurabaan, pareshaan aur bejaan – sab sahee hain!

---

hoshngaabaad ke paas narmadaa maaee ke parakammaavaasee (net se liyaa chitr): vegad jee kaa jikr huaa to parakammaavaasee yaad ho aaye!

---

kaun chaahataa hai ilektonifikeshan ?

---

injeeniyaring kee assee pratishat padhaaee maine slaaidarool aur logarithmik tebal kee sahaayataa se kee gaee gananaa se paar kee thee. padhaaee ke chauthe aur paanchaven saal men kailkyuletar najar aane lage the. jab maine naukaree karanaa praarambh kiyaa thaa, tab ilektonik taaiparaaitar bhee ikkaa-dukkaa hee aa rahe the. mujhe yaad hai ki us samay maine padhaa thaa ki do dashak men seepeeyoo kaa maas prodakshan itanaa hone lagegaa ki utanee jatil chip dedh dolar men aane lagegee.

byoorokresee ilektroneefikeshan naheen chaahatee. isase usakaa kilaa dhahataa hai. paavar kam hotee hai. janataa empaavar hone lagatee hai. jo bhrasht hain, unake khelane khaane ke avasar kam hone lagate hain.

par usake baad to korporet jagat men jabaradast vistaar huaa. soochanaa aur doorasnchaar kee takaneekon men to visfot saa huaa. nandan nilekanee kee pustak “imaijining indiyaa" (Imagining India) padhate samay yah mere man men baarambaar aayaa ki yah kraanti maine keval saaidalaain men khade ho dekhee.

yah hataashaa avashy hotee hai ki ye log jab infosis banaa rahe the tab ham daftar kee faail men noting pej aur karospondens pej par nambar daalane aur flaig lagaane men mahaarat haasil kar rahe the. yaad padataa hai ki hamaare divijanal rel mainejar ne assee ke uttaraardh men paanch panne kaa ek mahatvapoorn not likhaa thaa ki faail kaise menten kee jaaye!

aur ab bhee rel bhavan (rel mntraalay) ko jaane vaalaa maasik ardhashaasakeey patr jisamen saikadon pej hote hain aur bees pachchees logon ko pratiyaan bhejee jaatee hain, kaagaj par jaataa hai. isakaa 5 pratishat (main jyaadaa aashaavaadee hoon kyaa?) hee padhaa jaataa hogaa. ee-mel kaa prayog shaayad (?) kuchh junoonee karate hain aur puraanaa maal parosatee chirakut see sarakaaree veb saaiten munh chidhaatee prateet hotee hain.

sivaay baat karane men haaitek jaahir hone kee jaroorat ke; byoorokresee (man se) ilektroneefikeshan naheen chaahatee. isase usakaa kilaa dhahataa hai. paavar kam hotee hai. janataa empaavar hone lagatee hai. jo bhrasht hain, unake khelane khaane ke avasar kam hone lagate hain. rel kee dashaa to fir bhee behatar hai. baakee vibhaagon ke eteetyood ko dekh bahut maayoosee hotee hai.

at: “yooneek aaidentitee athoritee aof indiyaa” ke roop men nandan nilekanee agar vah kar gujaren jo ve apanee kitaab men likhate hain to aanand aa jaaye!

san 2010 tak to shaayad beemaaroo raajyon kee janataa kaa nambar malteeparapaj neshanal aaidentitee kaard milane men naheen lagegaa. par jin raajyon men laagoo hogaa, vahaan ke laabh dekh kar yojanaa ke vyaapak kriyaanvayan ke dabaav badhane kee sambhaavanaayen banatee hain.

yah “yooneek aaidentitee athoritee aof indiyaa” to ek paksh hai. ilektronifikeshan se kaee kshetron men sudhaar apekshit hain. kuchh sudhaar to aarakshan aur sabasidee ke gorakhadhandhe ko tarkasngat tareeke se khatm karane hetu hain, jinase bhrashtaachaar kam ho aur laabh seedhe taarget varg ko mile. par vah sab ilektronifikeshan kaun maangataa hai?

asal men ilektronifikeshan koee chaahataa naheen. janataa isake laabh kee seedhe-seedhe kalpanaa naheen kar sakatee. par isake laabh jaise jaise udghaatit honge, vaise vaise isake laagoo karane ke dabaav badhenge. aur chaahe mulaayam sinh jee hon yaa koee aura; apane raajanaitik risk par bhee use rok n paayenge. vah jamaanaa gayaa jab tark hote the ki kampyootar aayegaa to naukariyaan khaa jaayegaa! relave kampyootareekrit tikat pranaalee kaa yooniyanen vyaapak virodh kar rahee theen kuchh dashak pahale aur ab snchaar-link thodee der ko band hotaa hai to karmachaaree hee shor machaate hain.

shreeman, yah paanch sau pejon ki kitaab ek baar padh len. honaa vahee hai – jaise pragatit hogaa. par use padhane se aap use behatar samajh sakenge aur shaayad behatar svaagat kar saken.

---

vikeepediyaa (Wikipedia) kee vishvasaneeyataa

---

jab main vidyaarthee thaa; aur yah bahut pahale kee baat hai; tab mujhe print maadhyam ke prati shraddhaa thee. “aisaa falaanee kitaab men likhaa hai” yaa yah “d hindoo men chhapaa thaa” kah kot karanaa ek saty ko prakatit karane jaisaa hotaa thaa. fir yah prakatan huaa ki yah likhane vaale bhee ham jaise hain aur ve anajaane men yaa jaanaboojh kar asaty thel jaate hain. lihaajaa print kaa glaimar dhundhalaa pad gayaa.

kuchh shraddhaa bachee rah gayee. kuchh klaasiks ke prati. ensaaiklopeediyaa britenikaa ke prati bhee. sarakaaree vetan men itane paise ekamusht jugaad n kar paayaa ki ensaaiklopeediyaa britenikaa khareed paataa. usake baad intaranet kaa jamaanaa aa gayaa. vikeepediyaa kaa vyaapak prayog karane lagaa. par kabhee n kabhee vah fej aanee hee thee ki isake meteeriyal par snshay hotaa. sumant mishr jee dvaaraa diye gaye ek link se vah bhee hone lagaa aur jabaradast hone lagaa.

vikeepediyaa-vaach naamak is saait kaa aap avalokan karen. main isakaa mureed banane kaa aavaahan naheen kar rahaa. main keval yah bataane kaa prayaas kar rahaa hoon ki vikeepediyaa kee saamagree par sent-par-sent nirbharataa sahee naheen hai.

badaa masaalaa hai is vikeepediyaa par. angejee men hee > 29,26,275 lekh honge. saare maal matte ko print kiyaa jaaye to vah itanaa hogaa jitanaa britenikaa ke 952 vaalyoom men samaaye. snlagn chitron men rob maithyooj naamak sajjan ne isakaa 0.01% (~ 5000 pej) print kiyaa hai. badaa impresiv lagataa hai. par kaun padhegaa itanee motee kitaab!

vikeepediyaa men feechard aarteekal aur chitr aadi ke roop men chhaanane kee paramparaa hai. lekin koee tareekaa naheen lagataa ki sarch injan keval feechard kantent par hee le jaaye. at: aapakee sarch se saamane aayaa kitanaa khaalis maal hogaa, kitanaa churaatatv aur kitanaa bandal vikeepediyaa par, kahaa naheen jaa sakataa! hindee blogon se jyaadaa hogaa yaa kam?

agalee baar aap vikeepediyaa par jaayen to bataur prayoktaa jaayen aur apanee snshayaatmikaa buddhi apane saath rakhen!

---

leegal-ethiks (Legal Ethics) heenataa

---

main es jee abbaas kaajamee ko bataur ek akele vyakti, yaa duraagrahee vyakti (paravart indeeveejual) ke roop men naheen letaa. ve kasaab ko bachaa le jaayen yaa naheen, vah muddaa naheen hai (ve n bachaa paayen to shaayad sarakaar bachaaye rakhe). muddaa yah hai ki koee vyakti/vakeel yah jaanate huye bhee usake paksh men galatee/khot hai, us paksh kaa bachaav kaise kar sakataa hai?

---

yah pustak maine naheen padhee. net par isakaa privyoo maatr padhaa hai. aur vah rochak hai.

main vaad-vivaad pratiyogitaaon men chamakadaar naheen rahaa. par chhaatr dinon men apane mitron ko vaad vivaad men kisee vishay ke paksh aur vipaksh men mudde jaroor saplaaee kiye hain. aur kaee baar to ek hee dibet men paksh aur vipaksh dono ko masaalaa diyaa hai. par agar kisee mudde par apane ko bauddhik yaa naitik roop se pratibaddh paataa thaa, to vahaan kinaaraa kar letaa thaa. durbhaagy se kaajamee chhaap leegal kaam men vah kinaaraa karane kee eemaanadaaree najar naheen aatee.

mitron, bhaarat men vidhi vyavasthaa men snsaadhanon kee kamee sabase badaa muddaa naheen hai. kis vyavasthaa men snsaadhan kee kamee naheen hai? main kisee bhee projekt par kaam karanaa praarambh karataa hoon to sabase pahale snsaadhanon kee kamee munh baaye deekhatee hai. main maalagaadee parivahan dekhataa hoon. usamen injana/vaigana/chaalaka/ traik kshamataa – sab kshetron men to kamee hee najar aatee hai. tab bhee hamen parinaam dene hote hain.

par agar apane kaam ke prati anaitik hotaa hoon, tab bantaadhaar honaa praarambh hotaa hai. tab main chhadm khel khelane lagataa hoon aur baakee log bhee mujhase vahee karane lagate hain.

yahee mujhe bhaarat ke leegal sistam men najar aataa hai. klaayant aur usake kes ke galat yaa sahee hone kee paravaah n karanaa, tark shakti kaa ashleel yaa bulish prayog, nyaayadheesh ko avaidh tareeke se prabhaavit karane kaa yatn, farjee daakyooment yaa gavaah se kes men jaan daalanaa, apane klaayant ko mauke par chup rah jaane kee kutil (yaa yah kaanoon sammat hai?) salaah denaa, golabandee kar pratipaksh ko kinaare par dhakelanaa, maamalon ko dashakon tak latakaaye rakhane kee takaneekon(?) kaa prayog karanaa --- pataa naheen yah sab leegal ethiks kaa hissaa hai yaa usakaa durupayog? jo bhee ho, yah saamaany jeevan kee naitikataa ke khilaaf jaroor jaataa hai. aur aap yah bahutaayat men hotaa paate hain. meree to ghraan shakti yaa aobjarveshan paavar bahut sashakt naheen hai – par mujhe bhee yah uttarottar badhataa najar aataa hai.

shreeman, yah leegal-ethiks heenataa asal ganak hai jo vyavasthaa ke mahatvapoorn anga/khambhe ko khokhalaa karataa hai. aur is tathy ko is aadhaar par anadekhaa/darakinaar naheen kiyaa jaa sakataa ki vyavasthaa ke saare hee khambhe to khokhale ho rahe hain.

aur sahee samaadhaan kaajameetv ke sthaanapar vyaapak yudhishthireekaran kee baat karanaa naheen hai. aap kisee ko jabaree ethikal naheen banaa sakate. par ilektronifikeshan men samaadhaan hain. nandan nilekanee ko kisee any kshetr men isee prakaar ke samaadhaan hetu athoritee kaa adhyaksh banaayaa gayaa hai. kuchh vaisaa hee kaam leegal kshetr men bhee honaa chaahiye.

---

pratispardhaa

---

main muththeegnj men daal ke aadhtiye kee gaddee par gayaa thaa - arahar kee pachaas kilo daal laane ke liye. daal koee aur laa sakataa thaa, par maatr jijnyaasaa ke chalate main laane gayaa.

pratispardhaa karmath vyakti ko aage badhaatee hai. takaneekee vikaas yah faiktar laa rahaa hai bijanes aur samaaj men. yah pratispardhaa uttarottar svasth (naitik niyamon ke antargat) hotee jaaye, to vikaas tay hai.

saamane dukaan ke kamare men do takhte bichhe the. unapar gadde aur safed chaadaren theen. do muneem jee vaalee desken rakhee theen gaddon par. aadhatiyaa jee baithe the aur teen chaar log aur the. kisee ko koee afaraatafaree naheen. alasaayaa saa bhaav.

maine dekhaa ki koee laipatop yaa kampyootar naheen thaa. kisee prakaar se yah naheen lagataa thaa ki ye sajjan kamoditee ekschenj se aon-laain jude hain. en.see.dee.ee.eks yaa em.see.eks kaa naam bhee n sunaa thaa unhonne. koee laind-laain fon bhee n dikhaa. tab maine poochhaa – aap bijanes kaise karate hain? koee fon-von naheen dikh rahaa hai.

bade khush mijaaj sajjan the ve. apanee jeb se unhonne ek saste modal kaa mobaail fon nikaalaa. usakaa disple bhee kalar naheen lag rahaa thaa. nishchay hee ve usakaa prayog maatr fon ke liye karate rahe honge. koee esaemaes yaa intaranet naheen. bolane lage ki isase sahooliyat hai. hameshaa kaam chalataa rahataa hai. pichhalee baar raanchee gaye the rishtedaaree men, tab bhee is mobaail ke jareeye kaarobaar chalataa rahaa.

maine baat aage badhaaee – achchhaa, jab har sthaan aur samay par kaarobaar kee kanektivitee hai to bijanes bhee badhaa hogaa?

un sajjan ne kuchh samay liyaa uttar dene men. bole – isase kampeeteeshan bahut badh gayaa hai. pahale postakaard aane par bijanes hotaa thaa. haftaa-das din lagate the. laindalaain fon chale to kaam naheen karate the. ham log teleegraam par kaam karate the. ab to har samay kee kanektivitee ho gayee hai. graahak aardar men mobaail fon kee sahooliyat ke chalate kaee baar badalaav karataa hai saude ke antim kriyaanvayan ke pahale.

kampeeteeshan – pratispardhaa! bahut sahee bataayaa un sajjan ne. pratispardhaa karmath vyakti ko aage badhaatee hai. takaneekee vikaas yah faiktar laa rahaa hai bijanes aur samaaj men. yah pratispardhaa uttarottar svasth (naitik niyamon ke antargat) hotee jaaye, to vikaas tay hai.

ve to daal ke aadhatiye hain. daal ke bijanes kaa kendr naagapur hai. lihaajaa vahaan ke sampark men rahate hain. usase jyaadaa kamoditee eksachenj men sir ghusaanaa shaayad vyarth kaa soochanaa sngrah hotaa ho. apane kaam bhar kee jaanakaaree thee unhen, aur paryaapt thee – jaisaa unakaa aatmavishvaas darshit kar rahaa thaa. unake paas pndrah minat vyateet kar unake vyavasaay ke prati bhee raag utpann ho gayaa. kitanaa badhiyaa kaam hai? aapakaa kyaa khyaal hai?

aadhat kee gaddee par baith kaam karate shree jayashnkar “prasaad” banane ke chaansej banate hain. par kyaa bataayen, “kaamaayanee” to likhee jaa chukee!

---

aapako kyaa probalam hai?!

---

chhotee see ladakee mujhe kitaab naheen padhane de rahee. nandan nilekanee kee pustak men angrejee aur usake kaaran ban rahe rojagaar ke avasaron par padh main fir kuchh vivaadaaspad soch rahaa hoon. hindee ab bhee rojagaarapradaayinee naheen hai. dheron bijanes proses aautasorsing ke job bhaarateeyon ko angrejee kee jaanakaaree se mile hain. …. par vah chhotee ladakee baar baar vighn daalatee hai sochane men.

baar baar mere paas apane chhote-chhote prashn le kar chalee aatee hai. aur main usake prashnon ke tvarit uttar detaa hoon. un uttaron ko le kar vah chalee jaatee hai aur thodee der men vaapas aa jaatee hai agale set ke prashnon ke saath. agar main usake prashnon ko taalane kee baat karoon to shaayad vah mujhe bhee vaisaa hee kahe jaisaa apanee daadee ko kahatee hai – aapako kyaa probalam hai?!

main usakee oorjaa aur prashn daagane kee ret se prabhaavit hotaa hoon. yah post likhane baith jaataa hoon. par isamen bhee vah daanye-baayen se apanaa munh ghusaaye rahatee hai. door jaane ko kaho to laipatop ke peechhe se jhaankatee hai.

ve do bahanen hain. dono hee jijnyaasu aur dono hee apane foofaa se jyaadaa buddhimaan. yah aane vaalee peedhee hai aur yah agar hamaaree takkar men khadee ho gaee maanasik halachal ko kohaniyaa kar kinaare kar degee.

main yahee hopiyaa sakataa hoon ki in gadahiyaa gol aur darjaa paanch vaalee ladakiyon ko unakee kampyootar teechar bahut jaldee blog banaanaa n sikhaade! par mere hop karane se aajatak kuchh huaa hai!

aur main nilekanee kee pustak ke do-teen panne hee padh paayaa hoon. koee pachhataavaa naheen!

---

kuchh puraanee posten

---

yah kuchh puraanee posten hain. “maanasik halachal” men lekhan vividh prakaar ke hain. ye teenon post vividh dishaaon men bahatee thaharee hain. aap dekhane kaa kasht karen.

indaaraa kab upekshit ho gayaa? bachapan men gaanv kaa indaaraa (kuaan) jeevan kaa kendr hotaa thaa. khurakhunde (asalee naam maataadeen) knhaar jab paanee nikaalataa thaa tab gadaaree par neeche-oopar aatee-jaatee rassee (lajuree) sngeet paidaa karatee thee. dhaaree daar nekar bhar pahane usakaa gabaroo shareer ab bhee mujhe yaad hai. pataa naheen usane indaare se paanee nikaalanaa kab bnd kiyaa. indaaraa ab istemaal nahee hotaa. aage padhen.	kissaa paande seetaaraam soobedaar aur madhukar upaadhyaay seetaaraam paande vaastav men the aur unhonne yah pustak avadhee men likhee thee, yah madhukar jee kee pustak kee prastaavanaa se spasht ho jaataa hai. san 1915 men sar girijaashnkar vaajapeyee ne apane sivil sevaa ke intaravyoo men yah kahaa thaa ki seetaaraam paande ne yah kitaab unake daadaa ko dee thee aur unhone yah kitaab padhee hai. par usake baad yah paandulipi gaayab ho gayee aur madhukar jee kaafee yatn kar ke bhee use dhoodh naheen paaye. tab unhone is pustak ko avadhee me pun: rachane kaa kaary kiyaa. pooree post padhen.	krodh par niyntran kaise karen? krodh par niyntran vyakti ke vikaas kaa mahatvapoorn charan honaa chaahiye. yah kahanaa saral hai; karanaa duruh. main krodh kee samasyaa se satat joojhataa rahataa hoon. abhee kuchh din pahale krodh kee ek visfotak sthiti ne mujhe do din tak kinkartavyavimoodh kar diyaa thaa. tab mujhako svaamee budhaanand ke vedaant kesaree men chhpe lekh smaran ho aaye jo kabhee maine padhe the. jo lekhan jyaadaa apeel karataa hai, use main paavarapvaaint par sametane kaa yatn karataa hoon. pooree post padhen.

---

kantrol painal men taig-klaaud dikhaane sambandhee templet parivartan ke baare men tarun jee kee post thee. main usake anusaar to naheen kar paayaa – teknoraatee taig saaidabaar men sahee taur par ant naheen rahe the aur templet parivartan bhee theek se kaam naheen kar rahaa thaa. antat: maine is post kaa prayog kar yah banaayaa (saaidabaar men upayog dekhen): tarun jee ke blog se yah vichaar achchhaa milaa ki lebal kee list lagaane kee bajaay klaaud lagaanaa behatar lagataa hai aur jagah bhee kam letaa hai!

---

tootaa machaan

---

tootaa machaan khoob machamachaa rahaa hai. sadaroo bhagat chadhane kee koshish kar rahe hain usakee tootee machiyaa par. par jitanee baar traaee maarate hain, utanee baar badd-badd girate hain pathakanee ke bal. aaloo-paraval kaa chokhaa khaa kar intelekchual banane chale hain lanth kaheen ke!

sadaruaain baar baar kahatee hain ki tohare saat pusht men kauno intelekchual rahaa; jaun tum halakaan kiye jaa rahe ho jiyaraa! itanaa halakaan ham par kiye hote to silimadaak jaisee filim banaa diye hote. rah gaye baudam ke baudam!

tootaa machaan bhavishyavaanee karataa hai - intelekchual bananaa hai to dalitavaadee bano, saamyavaadee bano. samaajavaadee bhee chalegaa. par bhagatavaadee banane se to aaraesaes ke bhalantiyar se jyaadaa n ban paaoge! kauno kareeyar n banegaa - n saahitt men, n raajaneeti men n saaikal kaa hee!

tootaa machaan kee chithadee poleetheen kee dhvajaa faharaa rahee hai. par yah chirakut hee kahate hain ki havaa bah rahee hai yaa dhvajaa faharaa rahee hai. intelekchual hee jaanate hain ki pavan sthir hai, dhvajaa sthir hai; keval man hai jo fahar rahaa hai.

man ko toote machaan par ekaagr karo mitr! pngebaajee men kyaa dharaa hai!

---

bataao, kabeer emabeee bhee n the! yah mujhe shivakumaar mishr kee isee post kee tippanee se pataa chalaa! :

sadaroo bhagat agar anapadh hain to kyaa huaa? kabeer kaun saa beee, emae paas kiye the? sunaa hai emabeee bhee naheen paas kar paae the. kabeer kaa likhaa padhkar n jaane kitane intelekchual gati ko praapt ho gae!

---