jayapur litarechar festival par baatacheet

haal hee men sampann hue jayapur litarechar festival ke baare men do durgaaprasaad agravaal se do rajaneesh bhaaradvaaj kee baatacheet aap hindee ke varishth lekhak hain, sajag aalochak hain, vastuparak vishleshak hain, desh-videsh ghoomane kaa aapako samriddh anubhav hai, abhivyakti kee vartamaan takaneekon ko achchhee tarah samajhate hain tathaa unakaa upayog bhee karate hain. isee drishti se main aapake samaksh aise kuchh prashn rakh rahaa hoon jinakaa uttar aap hee de sakate hain.  aap jayapur men aayojit jayapur litarechar festival ke har aayojan ko dekhate aa rahe hai. ab tak hue utsavon kee saahityik upalabdhiyon ko aap kis prakaar rekhaankit karenge? jayapur litarechar festival kee shuruaat 2006 men huee thee, aur us baras isamen maatr 18 lekhakon aur 14 any logon ne bhaag liyaa thaa. inhen sunane vaalon kee snkhyaa bamushkil 100 rahee hogee. is baras yaani 2012 ke festival men lagabhag 250 lekhakon ne shirakat kee aur unhen dekhane-sunane vaalon kee snkhyaa ek laakh ke lagabhag bataaee jaatee hai. yaani bahut kam samay men yah utsav bahut badaa ho gayaa hai. in barason men is aayojan men desh videsh ke anek bade aur bahut bade lekhakon ne shirakat kee hai. is baras ben okaree, richard dokins, steevan pinkar, emee chuaa jaise videshee aur gireesh karnaad, ke. sachchidaanndan, pratibhaa re, kuladeep naiyar, em. je. akabar, ashok vaajapeyee, purushottam agravaal, neelaabh ashk jaise anek bhaarateey lekhak isamen aae. mujhe lagataa hai ki kisee bhee saahityik aayojan kee upalabdhi yahee ho sakatee hai ki vah lekhak-paathak ko najdeek laae. is lihaaj se to main is aayojan ko upalabdhimoolak hee kahanaa chaahoongaa.  is festival se saahity aur samaaj ko kyaa laabh huaa? is savaal kaa javaab denaa to bahut mushkil hai. kyaa kisee bhee saahityik aayojan ke baare men yah savaal karake koee seedhaa uttar paayaa jaa sakataa hai? ek badaa lekhak shahar men aataa hai, koee snsthaa unake vyaakhyaan kaa aayojan karatee hai, yaa kisee vishay par koee charchaa aayojit kee jaatee hai, kisee pustak par koee charchaa hotee hai. in sabake sandarbh men agar koee yah poochhe ki inase saahity aur samaaj ko kyaa laabh huaa, to kyaa uttar denge? meraa yah maananaa hai ki kisee bhee saahityik aayojan kaa maksad hotaa hai vimarsh kaa mnch pradaan karanaa aur vrihattar samudaay tak pahunchanaa. to is lihaaj se yahee kahaa jaaegaa ki jayapur litarechar festival ne saahity aur samaaj donon ko laabhaanvit kiyaa hai. saahityakaaron ko paathak mile aur paathakon ko saahity aur saahityakaar. agar ham yah bhee maan len ki yah koee gambheer aayojan naheen thaa, ek festival thaa, ek utsav thaa, to bhee is baat ke mahatv ko kam karake aankanaa uchit naheen hogaa ki poore paanch din har din ek saath chalane vaale saat gunaa paanch yaani paintees satron men se harek men lagabhag haausaful kee sthiti rahee. logon ne har tarah ke lekhakon ko n keval dattachitt hokar sunaa, unase gambheer savaal bhee kie. samaaj ko yah laabh huaa ki use itane saare lekhakon, vichaarakon, patrakaaron aur any bahut saare anushaasanon ke sheershasth logon se roobaroo hone kaa aur unake vichaaron se avagat hone kaa maukaa milaa, aur saahity kaa laabh yah huaa ki usakaa prasaar huaa. prasngavash, yah bhee kahoon ki is festival men kitaabon kee jo dukaanen theen, aur jin par is festival men shirakat karane vaale lekhakon kee kitaaben upalabdh theen, antim din unamen se adhikaansh khaalee ho chukee theen. yaani logon ne n sirf charchaaon ko sunaa, charchaa karane vaale lekhakon kee kitaabon ko khareedaa bhee sahee. kitaabon par lekhakon ke aotograaf lene vaalon kee bhee bahut lambee kataaren dekhane ko mileen.  is utsav ko aayojit karane vaalon kee mool pratijnyaa shaayad bade-bade lekhakon ko ek mnch par ikatthaa karanaa aur unake maadhyam se darshakon ko chamatkrit karanaa hai jisakee parinati manornjan men hotee hai. kyaa saahity kee mool pratijnyaa se is aayojan kee mool pratijnyaa mel khaatee hai? is baat men koee shak naheen hai ki is aayojan men bahut saare bade lekhakon kee sahabhaagitaa rahatee hai. yah sahabhaagitaa har baras badhtee jaa rahee hai. bade naamon ke prati aakarshan ham sabamen hotaa hai. agar ham koee bahut chhotaa aayojan karate hain tab bhee hamaaree yah koshish to hotee hee hai ki apane snsaadhanon ke hisaab se kisee ‘bade’ lekhak ko usamen bulaaen. ham jayapur men koee aayojan karate hain to aur naheen to yahee koshish karate hain ki dillee kaa koee lekhak aa jaae. aise men agar itane bade paimaane kaa koee aayojan hai to yah bahut svaabhaavik hai ki usamen bade-bade lekhak bulaae jaaenge. agar aap bade lekhakon ko naheen bulaaenge to is paimaane kaa aayojan ho hee naheen sakataa. lekin aapane ek mahatvapoorn tippanee yah kee hai ki aayojak bade-bade lekhakon ko ek mnch par ikatthaa karake darshakon ko chamatkrit karanaa chaahate hain. aapane apanee tippanee ke saath ‘shaayad’ jodkar yah aashnkaa vyakt kee hai. main ek udaaharan dekar fir apanee baat kahoongaa. is baar ke staar lekhakon men se ek the ben okaree. 23 janavaree kee shaam jis samay unakaa satr thaa usee samay ke chaar doosare satron men se ek satr utane hee mahatvapoorn lekhak richard dokins kaa thaa, aur ek any satr kavitaa samay sheershak se thaa jisamen ashok vaajapeyee, nand kishor aachaary, nand bhaaradvaaj, peeyoosh daeeyaa aur lataa sharmaa the. isee tarah aayojan ke pahale din ek satr men hairee kunjuroo the, doosare men (yah baat alag hai ki unhen lekhak maanen bhee yaa n maanen, lekin ‘bade’ to ve hain hee) kapil sibbal the, ek any satr men ke. sachchidaanndan the aur ek aur any satr kathaa kosh men navatej saranaa aur deepti naval ke saath hamaare apane charan sinh pathik, aur lakshmee sharmaa the. jo baat main rekhaankit karanaa chaahataa hoon vah yah ki kisee ek satr men staar lekhak ke hone ke baavajood shesh sabhee satron men bhee darshakon-shrotaaon kee bharapoor upasthiti thee. ab bataaiye, ki chamatkaar kaa kyaa asar rahaa? jis vakt gulajaar aur jaaved akhtar jaise staar ek satr men maujood hon usee vakt agar log rosaamund baartalet, pavan varmaa, purushottam agravaal aur jems shaipiro ko datt chitt hokar sunen to bataaiye ki chamatkaar kaa kyaa asar rahaa? mujhe naheen lagataa hai ki aayojakon kaa maksad chamatkaar paidaa karanaa rahaa hai. alabattaa bade lekhakon ko unhonne jroor jutaanaa chaahaa aur isamen ve kaamayaab bhee rahe hain. lekin, aayojan men sirf bahut bade lekhak hee hon, aisaa bhee naheen hai. aise bahut saare lekhak bhee isamen aate rahe hain jinakee abhee pahalee hee kitaab aaee hai aur jo saahity kee duniyaa men apanee pahachaan banaa rahe hain. yaani, kul milaakar ek samanvay kee sthiti mujhe to najr aaee. vaise, aapane yah savaal naheen poochhaa hai, lekin main bataa doon ki is aayojan men har dafaa kuchh filmee sitaare bhee shirakat karate rahe hain. kabhee amitaabh bachchan, kabhee aamir khaan, kabhee dev aannd to kabhee om puree, aadi. aam taur par huaa yah hai ki kisee sitaare kee koee kitaab us dauraan prakaashit huee to usake promoshan ke lie us sitaare ko bhee bulaa liyaa gayaa. beshak aisaa karane ke peechhe vyaavasaayik najriyaa hotaa hai. lekin ek baat to yah ki is aayojan ke kartaadhartaaon ne saahity kee ek vyaapak paribhaashaa lee hai. ham log aam taur par jise saahity kahate hain, ye usase kaafee door tak jaate hain aur raajaneeti, arthashaastr, samaajashaastr, sinemaa, manornjan, patrakaaritaa sabhee ko saahity kee paridhi men lete hain. yahee vajah hai ki inake aayojanon men tarun tejapaal bhee hote hain, em. je. akabar bhee, kuladeep naiyar bhee, maark tulee bhee, barakhaa datt bhee aur opraa vinafre bhee. mujhe to lagataa hai ki jnyaan kee vividh shaakhaaon ke beech paarasparik samvaad kaa yah khayaal buraa naheen hai. main aayojan men aane vaale logon kee taareef karoongaa ki ve mahaj glaimar ke peechhe naheen bhaagate hain aur jab kisee glaimar vaale staar kaa satr chal rahaa hotaa hai us vakt bhee ve kisee gambheer lekhak ke satr ko apanee pasnd banaate hain. lekin isake baavajood mujhe is baat ko lekar chintaa hotee hai ki is aayojan men glaimar kaa anupaat badhtaa jaa hai. main chaahoongaa ki aayojak is pravritti par lagaam lagaaen.  is utsav ke darshak kaun hain? kyaa inamen men ve log shaamil hain jinakee peedaaon kee baat ham apanee bahason men karate hain? is utsav ke daravaaje sabake lie khule rahate hain. aapako bhee smaran hogaa ki shuruaatee barason men to aayojakagan nimntranon kee baakaayadaa baadh hee laa diyaa karate the. dheere-dheere kaagaj kee us barbaadee men kamee karane kee sadbuddhi inhen aaee aur snchaar maadhyamon ke jriye logon ko aamntrit kiyaa jaane lagaa. is varsh pahalee baar aayojakon ne aagntukon ke lie pnjeekaran kaa praavadhaan kiyaa, aur usake peechhe surakshaa sambandhee kaaran the, lekin pnjeekaran nishulk thaa. alabattaa shaam ke manornjan kaaryakramon ke lie tikit lagaayaa gayaa, lekin vah alag baat hai. to, is utsav men koee bhee aa sakataa hai. svaabhaavik hai ki jab itanaa badaa aayojan hogaa to aane vaalon kaa star ek samaan to ho naheen sakataa. jaisaa aapane kahaa, ‘jinakee peedaaon kee baat ham apanee bahason men karate hain’ ve agar is aayojan men aate hain to ve bhee aate hain jo (shaayad) un peedaaon ko janm dete hain. aur isamen mujhe koee harj bhee naheen lagataa. mahatv to is baat kaa hai ki is aayojan ke daravaaje sabake lie khule hain. balki, main to aage badhkar yah bhee kahanaa chaahoongaa ki yahaan jo prajaataantrik vyavasthaa hotee hai usakaa vistaar aur anukaran honaa chaahie. koee bhee kaheen bhee baith sakataa hai. ek satr men mainne dekhaa ki pavan ke. varmaa (ve bhootaan men bhaarat ke raajadoot hain) aae aur unhen koee kursee khaalee najr naheen aaee to ve gulajaar ke paas jmeen par hee baith gae. unake lie kursee khaalee karane ke vaaste kisee aam shrotaa ko uthaayaa naheen gayaa. kabhee-kabhee mujhe lagataa hai ki ham jis samaanataa kee baat jor-shor se karate hain, vo kriyaa roop men parinat hotee to yahaan najr aatee hai. lekin aapane baat peedaaon kee kee thee. is aayojan men lagaataar jaakar mainne paayaa hai ki yahaan sirf us saahity kee baat naheen hotee hai jo aam jan kee peedaaon se taalluk rakhataa hai. jaisaa mainne abhee kahaa, yahaan saahity ko vyaapak arth men liyaa jaataa hai, isalie yahaan jo darshak shrotaa samudaay aataa hai vah bhee vaividhyapoorn hotaa hai.  is utsav men aane vaale darshakon kee sthiti se kyaa is utsav kaa moolyaankan naheen honaa chaahie? aapakaa ishaaraa shaayad is taraf hai ki is aayojan men jo darshak aate hain ve sampann varg ke hote hain. aapake is prashn kaa uttar pichhale uttar men aa gayaa hai.  kyaa apako naheen lagataa hai ki ek praayojit eleet varg yahaan aa rahaa hai jo desh aur samaaj kee samasyaaon ke prati gambheer naheen hai? isakee jaden bhee hamaaree deshajataa men naheen hain shaayad? is prashn kaa uttar haan men bhee hai aur naa men bhee. pahale haan kee baat karoon. yah ek antarraashtreey star kaa aayojan hai. pooree duniyaa se isamen log aate hain. n sirf lekhak, ve bhee jinakee lekhan men ruchi hai. ab agar koee amareekaa se, jarmanee se, jaapaan se, yaa kahiye chennaee se, ahamadaabaad se ek saahityik aayojan men aa rahaa hai to jaahir hai ki usakaa saamaajik-aarthik-bauddhik star us taraf jhukaa hogaa jise aap eleet varg kah rahe hain. yah meree apanee jaanakaaree hai ki har baras is aayojan men duniyaa bhar se log apane kharche par (bhee) aate hain. yah svaabhaavik baat hai ki un sabakee jaden ‘hamaaree deshajataa’ men naheen hai. lekin is aayojan men jo sthaaneey log aate hain, unake baare men to aisaa naheen hai. ve us varg se itar ke bhee hain jinakee abhee main baat kar rahaa thaa. bahut saadhaaran kism ke logon ko mainne is aayojan men dekhaa hai. n keval dekhaa hai, sammaan aur adhikaar se agalee pnkti men thaath se baithakar charchaaon ko sunate dekhaa hai. to donon hee tarah ke log is aayojan men aate hain. aur rahee baat samasyaaon kee, to mainne yah mahasoos kiyaa hai ki aayojakon kaa najriyaa saahity ke prati vyaapak hai aur ve keval usee ko saahity naheen maanate hain jo samasyaaon kee fikr karataa ho. isase meree vyaktigat asahamati bhee ho sakatee hai, lekin isake baavajood main yah maanataa hoon ki aayojan kaa formet tai karane kaa hak to aayojakon ko hee hai.  kyaa is utsav kaa praaroop aapako upayukt lagataa hai jisamen sab jaldee men hain, bhaagamabhaag men hain? bas, hailo, haay, baay tak hee rishte ban paa rahe hain? aapakaa yah prashn mujhe bahut saarthak lagaa. is aayojan men har din ek-ek ghante ke saat satr hote hain. ye satr ek saath paanch jagahon par chalate hain. mote taur par lagabhag 175 satr. jaahir hai ki koee bhee vyakti ek vakt men ek hee satr men upasthit rahegaa, ant: vah adhik se adhik 35 satr dekh sun sakataa hai. lekin vah kaun-se 35 satr dekhe sune, yah chayan usakaa apanaa hogaa. yaani 175 men se 35 (yaa kam) chunane kee aajaadee use aayojak dete hain. yah vividhataa to prashnsaneey hai. agar aapakaa prashn yah hai ki ek satr ke lie ek ghante kaa vakt kam hai, to main yah kahanaa chaahoongaa ki agar lekhak vyavasthit aur suvichaarit roop se apanee baat kahe to yah samay kam naheen hai. haan, agar koee pandrah minit kee baat kahane ke lie do ghante kee bhoomikaa baandhanaa jrooree samajhataa ho to baat alag hai. doosare yahaan bahut saare satr to rachanaa paath ke hote hain. us lihaaj se to yah samay vaise bhee kam naheen hai. jayapur litarechar festival men jo baat mujhe sabase mahatvapoorn lagee vah hai samay ke prati unakaa aadar bhaav. agar koee satr das baje shuroo aur gyaarah baje khatm honaa hai to vah das baje hee shuroo hogaa aur gyaarah baje hee khatm hogaa. kisee kaa intajaar naheen, kisee ko apanee baat pooree karane ke lie atirikt samay naheen. ham log, vishesh roop se hindee vaale is baat ke abhyast naheen hain. hamaaraa kaaryakram agar teen baje ghoshit hai to bade logon ko to vaise hee saadhe teen kaa vakt bataayaa jaaegaa, aur agar chaar baje vo kaaryakram shuroo ho jaae to ganeemat maanie. fir maalyaarpan, svaagat, vaktaaon kaa parichay aur usake baad khud vaktaa, jise anntakaal tak bolane kaa visheshaadhikaar milaa hotaa hai. kaaryakram khatm hone kaa to koee samay hotaa hee naheen. koee vaktaa jab ek baar bolanaa shuroo kar de, chaahe vah aabhaar pradarshan hee kyon n kar rahaa ho, to samajhiye gayaa kam se kam aadhaa ghantaa. to, hamaare is abhyaas kee najr se dekhen to beshak yah aayojan bhaagamabhaag aur jaldabaajee kaa aayojan hai. lekin, is baar savaal mujhe poochhane den, ki kyaa hamen bhee apane aayojanon men samay kee kadr naheen karanee chaahie? kyaa samayabaddhataa koee aparaadh hai? kyaa apanee baat saleeke se aur sugathit roop se, pooree taiyaaree karake naheen kahee jaanee chaahie? kyaa ek nishchit samay men apanee baat kahane kaa anushaasan hamamen naheen aanaa chaahie?  ham jaldee-jaldee men, adhikaadhik logon kee shirakat ke chakkar men samaaj aur vyakti kee moolabhoot samasyaaon se takaraane ke bajaay unase bachane kaa prayaas naheen kar rahe hain? mere khayaal se ye do alag-alag baaten hain. jaldee-jaldee aur adhikaadhik logon kee shirakat kee baat abhee apan ne kee. ho sakataa hai ki yah dekhane kaa ek bhinn najriyaa bhee ho. jise main samayabaddhataa kah kar saraah rahaa hoon vahee kisee aur ko jaldabaajee bhee lag sakatee hai. soch kaa yah fark to rahegaa hee. lekin ise samaaj kee aur vyakti kee moolabhoot samasyaaon se takaraane kee bajaay unase kataraane kaa naam denaa mujhe uchit naheen lagataa. samasyaaon se takaraane ke lie samay kee barabaadee aur baat ko bevajah vistaar denaa jrooree naheen hai. agar vaktaa kee taiyaaree hai aur vah saleeke se apanee baat kah sakataa hai to usake lie tees minit bhee kaafee hain, anyathaa.... . agar main kahoongaa to chhote munh badee baat ho jaaegee, isalie main shreelaal shukl se shabd udhaar le rahaa hoon. unhonne kaheen kahaa thaa ki hindee lekhak snkshep men apanee baat kah hee naheen sakataa. baat ko failaanaa usake svabhaav men hee hai. agar yah baat sahee hai, to kyaa aapako naheen lagataa ki hindee lekhak ko bhee apanaa svabhaav badalanaa chaahie? aapakaa jo doosaraa savaal hai usakaa taalluk aayojan ke formet se hai. aur jaisaa mainne pahale bhee kahaa hai, kisee aayojan kaa formet kyaa ho yah to aayojak hee tai karegaa. is saahity utsav kaa formet agar hamaaree apekshaaon se alag hai, to hai.  kyaa aapane dekhaa hai ki diggee pailes ke baahar yaataayaat vyavasthaa, paarking aadi ko lekar kitanee maaraamaaree hai? is utsav ke kaaran rikshaavaalon, taiksee vaalon tathaa aam jan ko kitanee takleefen ho rahee hain? kyaa in baaton kaa ehasaas aayojakon ko hai? kyaa ve apanee banaavatee duniyaa men mast hain aur is tathy se bekhabar hain ki unake aayojan se jayapur ke aam jeevan men kitanee takleefen aam jan ko sahanee pad rahee hain? jayapur litarechar festival bahut badaa aayojan ban gayaa hai aur kisee bhee bade aayojan ke kaaran kuchh asuvidhaaon kaa honaa aparihaary hai. lekin meraa aisaa khayaal hai ki aayojak bhee aur sthaaneey prashaasan bhee lagaataar yah koshish karate hain ki aam logon ko kam se kam asuvidhaa ho.  diggee pailes ko jaise kile men tabadeel kar diyaa gayaa hai. chaaron or pulis hai, chaaron or paharaa hai, aam aadamee ke lie aam raaste tak bnd hain jabaki paas hee pradesh kaa sabase badaa aspataal hai, ajameree get hai, mahaaraajaa-mahaaraanee kolej hain, kul milaakar yah bahut vyast ilaakaa hai. kyaa is or aayojakon ko dhyaan naheen denaa chaahie? kyaa is baabat rachanaakaaron kaa kuchh snvedanaatmak daayitv naheen banataa hai? aisaa isee baar huaa hai. kaaran aap bhee jaanate hain. salamaan rushdee prakaran. yah kaanoon-vyavasthaa kaa maamalaa thaa aur agar prashaasan ko ehatiyaad baratanaa jrooree lagaa, to usane vaisaa kiyaa. agar ham aayojakon ko isake lie jimmedaar thaharaate hain, to mere jehn men yah savaal uthataa hai ki kyaa unhonne jaan-boojhakar salamaan rushdee ko bulaakar ‘aa bail mujhe maar’ ko charitaarth kiyaa hogaa? bhalaa kaun apanaa itanaa badaa aayojan daanv par lagaanaa chaahegaa? ho sakataa hai ki unhonne is baat kaa poorvaanumaan n kiyaa ho ki samaaj kaa ek hissaa rushdee ko bulaaye jaane ke virodh men uth khadaa hogaa aur sarakaar bhee jroorat se jyaadaa snvedanasheel ho jaaegee! mujhe lagataa hai ki is maamale ko sarakaar ne to glat tarah se haindal kiyaa hee, meediyaa ne bhee jroorat se jyaadaa ahamiyat dee. jo log aayojan men shareek naheen the unhen (meediyaa kee vajah se) yah ehasaas huaa ki saaraa aayojan rushdee ke ird-gird hee simataa huaa hai. jabaki yathaarth isase bahut bhinn thaa. lekin yah to vishayaantar ho gayaa. aapane rachanaakaaron ke snvedanaatmak daayitv kaa savaal uthaayaa thaa. is maamale men ham rachanaakaar se kis tarah ke snvedanaatmak vyavahaar kee ummeed karate hain?  kyaa yah aayojakon kee aatmamugdhataa naheen hai ki ve jayapur kee aam jindagee kee takleefon se bekhabar maanasik vilaas men doobe hain? behatar ho, yah savaal aayojakon se hee poochhaa jaae. main bhalaa unakee taraf se koee safaaee dene vaalaa kaun hotaa hoon?  kyaa yah naheen sochaa jaanaa chaahie ki isake aayojan ke lie kisee ekaant kee jagah ko chunaa jaae jahaan lekhakon ko bhautik takleefon kaa bhee ehasaas ho? yah savaal to bahut majedaar hai. aisee jagah chunee jaae jahaan lekhakon ko bhautik takleefon kaa ehasaas ho. baat sunane men to prabhaavashaalee lagatee hai. lekin kyaa asal jindagee men hameshaa aisaa hee hotaa aur kiyaa jaataa hai? apane mehamaanon ko ham suvidhaa denaa chaahate hain yaa takleef kaa ehasaas karaanaa chaahate hain? aap mujhe bataaen ki kaun-see saahityik snsthaa apane lekhakon ko bhautik takleefon kaa ehasaas karaane ke lie slams men yaa kachchee bastiyon men thaharaatee hai?  baahar se aane vaale lekhakon ko paanch sitaaraa yaa achchhe hotalon men thaharaayaa jaa rahaa hai. kyaa aane vaalon ke lie nae prakaar ke rain baseron kee vyavasthaa naheen honee chaahie? ham netaaon kee ayyaashee kee to baat karate hain, par ham bhee duhkh paane ke lie taiyaar kahaan hain? ek lekhak kaa ek din ek satr men prejenteshan aur vah paanch din yahaan hotal men maje kar rahaa hai ise ayyaashee naheen kahenge? kyaa aise lekhakon par bndish naheen laganee chaahie? kyaa yah sarvekshan naheen honaa chaahie ki kitane lekhak apane kharche par is utsav men baahar se aate hain? haan, ye log apane atithi lekhakon vagairah ko paanch sitaaraa yaa usee tarah ke behatar hotalon men thaharaate hain. mujhe naheen pataa ki ab tak kisee aagat lekhak ne is baat kaa virodh kiyaa yaa naheen. kiyaa hotaa to kaheen padhne ko bhee milaa hotaa. mujhe naheen pataa ki aise kaun se saahityik sngathan hain jo apane lekhakon ko rain baseron men thaharaate hain? aadarsh ke lihaaj se to baat bhalee lagatee hai ki lekhak bhee futapaath par soye, paidal chale, paseenaa bahaae, rookhee-sookhee khaakar thandaa paanee pee le. lekin yathaarth yah hai ki ham sab suvidhaaon ke aadee hote jaa rahe hain. ab yah baat aayojak kee kshamataa par hai ki vah kitanee suvidhaa de paataa hai. lekin mujhe naheen lagataa ki koee bhee lekhak is baat par aapatti karegaa ki use amuk-amuk suvidhaa kyon dee jaa rahee hai. aur jahaan tak ek satr men prastuti aur paanch din ke maje kee baat hai, is savaal ke peechhe mujhe ek khaas tarah kee maanasikataa kaa aabhaas mil rahaa hai, jo kam se kam mujhe to kabhee naheen ruchi. hamaare praant ke ek bade lekhak ne ek baar kisee sandarbh men chidh kar kahaa thaa, ki ham kyaa taalee bajaane jaaenge? yaani, agar lekhak badaa hai to vah sirf mnch par biraajegaa. shrotaa samooh men to vah baith hee naheen sakataa. vah sirf bol sakataa hai, kisee ko sun naheen sakataa. jayapur litarechar festival men mainne aisaa naheen paayaa. agar koee lekhak ek satr men apanee baat kah rahaa hai to baakee satr men vah auron kee baat sunataa bhee hai, unake satron men bataur shrotaa bhee upasthit rahataa hai. mainne bahut bade aur naamee lekhakon ko doosaron ke satr men baithe aur baaten sunate dekhaa hai. kisee kaa aagrah yah naheen rahataa ki vah sirf mnchaaseen hee hogaa. to yah to prashnsaneey baat hai ki ek lekhak ek satr men apanee baat kahataa hai aur baakee satron men auron kee baat sunataa hai. ise bhalaa ayyaashee kaise aur kyon kahaa jaae?  kyaa aayojakon ko utsav ke aay-vyay kaa hisaab janataa ke saamane naheen rakhanaa chaahie? ve praayojakon ke naam to ghoshit kar dete hain, aabhaar vyakt karane ke saath, par yah naheen bataate ki kisane kitane paise die, kitane paise kis mad par kharch hue. kyaa kuchh raashi bachee aur agar bachee to vah kahaan gaee. kyaa yah paaradarshitaa aavashyak naheen hai? paaradarshitaa honee chaahie, jroor honee chaahie. lekin kyaa jeevan ke any kisee kshetr men hamen is aadarsh paaradarshitaa ke darshan hote hain? vibhinn lekhak sngathan yaa snsthaan jo aayojan karate hain kyaa ve usakaa lekhaa-jokhaa saarvajanik karate hain? aap kah sakate hain ki unake aayojan itane bade naheen hote hain aur usamen itane adhik vitteey snsaadhan prayukt naheen hote hain. theek hai. lekin siddhaant to siddhaant hai. chhote aur bade kaa bhed kyon kiyaa jaanaa chaahie? aur ek baat. ho sakataa hai ki yah kahanaa ‘politikalee karekt’ n ho lekin ham jab baat kar hee rahe hain to jo baat mere man men hai mujhe use kahane men snkoch naheen karanaa chaahie. mujhe yah bhee lagataa hai ki ek aise aayojan jisamen meraa koee aarthik yogadaan naheen hai, ke aayojakon se main unake aay vyay ke baare men poochhane kaa kyaa hak rakhataa hoon? yah hak to unakaa banataa hai jinhonne usamen koee anshadaan kiyaa hai.  yah utsav kin moolyon kee sthaapanaa kar rahaa hai tathaa isakaa vaastavik prabhaav kyaa hai isakaa aakalan kis prakaar honaa chaahie? mere khayaal se to koee bhee utsav utsav hotaa hai, vah moolyon kee sthaapanaa ke nimitt naheen hotaa hai. haan, itanaa jroor dekhaa jaanaa chaahie ki usake kaaran koee vikritiyaan samaaj men n aaen. jahaan tak prabhaav kee baat hai, mujhe lagataa hai ki yah utsav samaaj kee saahity men dilachaspee badhaane men kaafee had tak kaamayaab rahaa hai. isakaa aakalan kaise ho, yah to main bhee naheen jaanataa.  ek aur baat. kyaa aapako aisaa naheen lagataa ki is aayojan kaa bahut adhik jhukaav angrejee kee taraf hai aur isamen hindee sahit tamaam bhaarateey bhaashaaon kee gahan upekshaa hotee hai? jee, mujhe ktaee aisaa naheen lagataa hai. isakee vajah yah hai ki mere man men yah baat bahut spasht hai ki yah saahity utsav hai, bhaarateey yaa hindee saahity kaa utsav naheen. agar aap saaree duniyaa ke sandarbh men dekhenge to paaenge ki hindee sahit bhaarateey bhaashaaon ko jo pratinidhitv mil rahaa hai vah sntoshaprad hai. thodaa asntulan hamen isalie bhee lagataa hai ki duniyaa ke doosare deshon ke saahity men se jyaadaatar kaa pratinidhitv yahaan angrejee ke maadhyam se hotaa hai (aur yah svaabhaavik bhee hai. agar kal ko koee french saahityakaar french bhaashaa men apanee baat kahegaa to use sunane-samajhane vaale kitane kam honge! yah ek sachchaaee hai ki any bhaashaaon kee tulanaa men angrejee bolane samajhane vaale adhik hain.). fir bhee, agar isamen bhaarateey bhaashaaon kaa pratinidhitv aur badhegaa to mujhe bhee prasannataa hee hogee.  hamaaree ab tak kee baatacheet se lag rahaa hai ki aap is aayojan se pooree tarah sntusht hain. kyaa aapako is aayojan men kuchh bhee apriy naheen lagaa? dekhie, sudhaar kee gunjaaish to har jagah hotee hai. meraa svabhaav hai ki main cheejon ko unake khaas sandarbh men dekhataa hoon aur moolyaankan karate vakt saamane vaale paksh kee seemaaon ko bhee dhyaan men rakhane kee koshish karataa hoon. varanaa aam taur par hotaa yah hai ki ham doosaron se had darje ke aadarsh kee ummeed karane lagate hain aur fir niraash hote hain. yah baat mere svabhaav men naheen hai. ab mujhe yah lagataa hai ki yah aayojan kul milaakar saahity aur jan ko najdeek laane kaa ek umdaa prayaas hai aur isee roop men main isakaa prashnsak hoon. beshak yahaan koee gambheer vimarsh naheen hotaa hai, aam taur par. lekin itane bade mele se aapako gambheer vimarsh kee ummeed bhee naheen karanee chaahie. doosare, kyonki yah bahut badaa aayojan hai, jaahir hai ki aayojakon par bahut saare vyaavasaayik dabaav bhee hote honge. ve najr bhee aate hain. mujhe naheen lagataa ki unase bachaa jaa sakataa hai. bachane kee ek hee raah ho sakatee hai aur vah yah ki aayojan kiyaa hee n jaae. agar koee mujhe chhoot de to main to is vikalp ko naheen chunoongaa. mujhe lagataa hai ki naheen karane se to yah behatar hai. ab aap kah sakate hain ki itanaa badaa aayojan kiyaa hee kyon jaae! agar aap yah kahen to isakaa koee javaab mere paas naheen hogaa. fir bhee, agar aadarsh kee baat karoon to kahanaa chaahoongaa ki aayojakon ko vyaavasaayik paksh, glaimar aur tadk bhadk se bachanaa chaahie. ek baat aur kahanaa chaahoongaa aur vah yah ki ab yah aayojan itanaa badaa ho gayaa hai ki diggee pailes isake lie upayukt naheen rah gayaa hai. main jaanataa hoon ki diggee pailes ke maalikaan yah sthaan aayojakon ko nishulk upalabdh karaate hain aur aayojakon ko apane aayojan kee maarketing ke lihaaj se ek ‘pailes’ raas bhee aataa hai, lekin ab unhen koee doosaree jagah talaash karanee hee chaahie. aur ek baat. main bhee is aayojan kee khoob saaree aalochanaaen padhtaa rahaa hoon. vaise to mujhe yah baat dilachasp lagee ki adhikaansh aalochanaaen logon ne bagair is aayojan men aae, aur binaa ise samajhe hee kee hai. sunee-sunaaee, padhee-padhaaee baaton ke aadhaar par. jo log kabhee is aayojan men shareek hue unamen se bahut hee kam ne isake baare men pratikool kuchh kahaa-likhaa hai. fir bhee, ek baat mere man men avashy aatee hai. thodee der ke lie main maan letaa hoon ki yah aayojan bahut kharaab hai, bahut nikrisht hai. to, kyon naheen ham ek aadarsh aur utkrisht aayojan karake dikhaate hain? hamen kisane rokaa hai? main jaanataa hoon ki hamaare yahaan yaani is festival se baahar bhee kaafee kuchh hotaa hai, achchhaa hotaa hai. haal hee men kavitaa samay kaa aayojan huaa. aise aur aayojan hon to kuchh baat bane. ◙◙◙ sampark sootr: do durgaaprasaad agravaal, ee-2/211, chitrakoot, jayapur- 302021. do rajaneesh bhaaradvaaj, e-243, trivenee nagar, gopaalapuraa baay paas, jayapur. 'ek aur antareepa' ke janavaree-maarch 2012 ank men prakaashit.

meediyaa: kal, aaj aur kal

meediyaa kee aajaadee kee baat abhivyakti kee aajaadee ke samaanaantar hai. jitanee jrooree abhivyakti kee aajaadee hai utanee hee jrooree meediyaa kee aajaadee bhee hai. aur mujhe yah kahane men garv kaa anubhav ho rahaa hai ki bhaarat men kuchh chhut-put apavaadon ko chhodkar ye donon hee aajaadiyaan vidyamaan hain. in chhut-put apavaadon kaa bhee samuchit virodh hotaa hai aur isalie unhen najrandaaj kar diyaa jaanaa chaahie. lekin jab ham badalate parivesh men meediyaa kee aajaadee kee baat karanaa chaahate hain to pahalaa savaal to yahee uthataa hai ki yah badalataa parivesh kyaa hai. vaise to isake anek sandarbh ho sakate hain lekin main filahaal baajaar aur poonjee ke sandarbh men is parivartit parivesh ko dekhate hue kuchh kahanaa chaahoongaa. pichhale kuchh barason men, mukt arthavyavasthaa aur udaareekaran ke prasaar se desh men kaafee kuchh badalaa hai, aur us kaafee kuchh men meediyaa bhee shaamil hai. ek samay thaa jab is meediyaa ko patrakaaritaa ke naam se jaanaa jaataa thaa aur use ek mishan maanaa jaataa thaa. lekin ab sirf usake naam men hee naheen charitr men bhee badalaav huaa hai aur vah mishan n rahakar ek vyavasaay men tabdeel ho gayaa hai. aur jab vah vyavasaay ban gayaa hai to jaahir hai ki usakaa lakshy bhee laabh arjit karanaa ho gayaa hai. ab isee badale hue parivesh men ham meediyaa kee bhoomikaa par vichaar kar sakate hain. meraa aisaa maananaa hai ki laabh ke baavajood ek aadhaarabhoot naitikataa aur aadarsh kaa bhaav to banaa hee rahanaa chaahie. lekin durbhaagy se kaee dafaa aisaa najr naheen aataa hai. chaakshush meediyaa men, khaas taur par nijee chainalon men, jahaan teeaarapee hee sarvopari ho gaee hai, aur mudran maadhyamon men bhee, kaee baar lagataa hai ki munaafaa hee sab kuchh ho gayaa hai. samaachaaron par vijnyaapan haavee dikhaaee dete hain aur ped nyooj vaalee baat bhee itanee puraanee naheen huee hai ki hamaaree smriti se vilupt ho jaae. samaachaaron ke chayan men laabh-haani kaa najriyaa saaf lakshit hotaa hai. mudran maadhyamon men hamaaree bhaashaa ke saath jo sulook ho rahaa hai usake mool men bhee yahee laabh kee pravritti kaam karatee dikhaaee detee hai. lagataa hai ki akhabaaron ke maalikon ko bhaashaa kee shuchitaa kee naheen koee chintaa naheen hai. balki ve to yah sochakar ki isase unako jyaadaa laabh hogaa, bhaashaa ko aur bhee vikrit karane jraa bhee snkoch naheen kar rahe hain. koee bhee maadhyam jad hokar naheen jee sakataa, lekin yah dekhaa jaanaa chaahie ki vah kis tarah badal rahaa hai. idhar adhikaansh akhabaaron men gambheer, vichaarottejak aur sakaaraatmak saamagree kaa anupaat nirntar ghat aur halkee-fulkee, chatapatee, ashleelataa kee taraf jhukee huee aur ek had tak vikrit rujhaan vaalee saamagree kaa anupaat badh rahaa hai. bahut baar lagataa hai ki meediyaa ko jin cheejon ke pratipaksh men honaa chaahie vah unheen ke samarthan aur sevaa men khadaa hai. nishchay hee yah sthiti chintaajanak hai. drishy maadhyamon men to arthashaastr kaa vah niyam bahut spasht najr aataa hai ki jab achchhee aur buree mudraa ek saath chalatee hai to buree mudraa achchhee mudraa ko prachalan se hataa detee hai. nijee chainalon ne dooradarshan ko lagabhag adrishy hee kar diyaa hai. nijee chainal matalab keval aur keval filmee saamagree. yahaan bhee jaise neeche girane kee ek hod lagee hai. riyalitee shoj ke naam par n jaane kyaa-kyaa dikhaayaa jaa rahaa hai. ab savaal yah rah jaataa hai ki aise men meediyaa se hamaaree apekshaaen kyaa hon? main jaanataa hoon ki besharm poonjee ke is daur men munaafe kee baat ko pooree tarah se khatm naheen kiyaa jaa sakataa, lekin fir bhee main yah ummeed karanaa chaahataa hoon ki meediyaa apane saamaajik daayitv ko vismrit n kare. vah logon kaa manornjan karane ke saath hee unhen shikshit aur snskrit karane ke apane daayitv kaa bhee nirvahan kare. manornjan kaa arth keval foohad naach hee naheen hai, manornjan suruchipoorn bhee ho sakataa hai. laabh khabaron ke vivekapoorn chayan aur sntulit prastutikaran se bhee kamaayaa jaa sakataa hai. main udaas to hoon, lekin niraash naheen hoon. mujhe vishvaas hai ki meediyaa apane bhatakaav ke is daur se jaldee hee ubaregaa aur fir se vah bhoomikaa adaa karane lagegaa jo usase apekshit hai. ◙◙◙ jayapur ke samaachaar patr delee nyooj men 26 janavaree, 2012 ko prakaashit.

varsh 2011 men hindee bhaashaa aur saahity

beetate jaa rahe saal ke aakhiree dinon men poore saal kaa lekhaa jokhaa karane baithaa hoon to sabase pahale is baat par dhyaan jaataa hai ki hamaare samaaj kee bhaashaa kee jrooraton men tejee se badalaav aa rahaa hai. ab tak ham jis tarah se bhaashaa ko baratate rahe hain, barataav kaa vah tareekaa ab prachalan se baahar hotaa jaa rahaa hai. hamaare samay men vibhinn kaaranon se, jinamen dambing daaun sindrom bhee ek hai, bhaashaa kee paaramparik mahattaa kaa tejee se ksharan huaa hai. svaabhaavik hai ki meree apanee bhaashaa hindee bhee is se achhootee naheen rahee hai. badhte vaishveekaran ne angrejee ko aur bhee adhik taakatavar banaayaa hai aur usake taakatavar hone kaa khaamiyaajaa tamaam bhaarateey bhaashaaon ko, jinamen hindee bhee ek hai, bhugatanaa padaa hai. rojee-rotee ke lihaaj se hindee kee mahataa men kamee aaee hai aur isakaa asar hindee ke paarnparik pathan-paathan par bhee padaa hai. nae khul rahe nijee vishvavidyaalayon men to bhaashaa ke adhyayan-adhyaapan kee sambhaavanaaen lagabhag khatm hee ho gaee hai. jahaan hindee kaa adhyaapan ho rahaa hai vahaan bhee sthiti behatar aur utsaahapoorn naheen hai. lekin vaise hindee men rojgaar ke nae avasar bhee khoob paidaa hue hain. anuvaad kaa baajaar khoob falaa foolaa hai lekin us baajaar ke lie hamaaree taiyaaree abhee kam hee hai. idhar bhaarat sarakaar ke grih mntraalay ke raajabhaashaa prabhaag ne ek vijnyapti jaaree kar hindee ke tathaakathit kathin shabdon kee bajaay angrejee ke prachalit shabdon kaa prayog karane kee salaah dekar hindee ko thes pahunchaaee hai. lekin aisaa bhee naheen hai ki sab kuchh nakaaraatmak hee hai. intaranet, mobaail aadi par hamaaree bhaashaa kaa prayog bahut tejee se badh rahaa hai lekin is vajah se bhaashaa ke svaroop men bahut tejee se badalaav aa rahe hain. aane vaale barason men hamen nae saanche men dhalee hindee ko dekhane kaa aur use baratane kaa abhyast honaa hogaa. jahaan tak saahity kaa savaal hai, ham chaahen to is baat par khushee manaa sakate hain ki khoob likhaa jaa rahaa hai aur chhap bhee khoob rahaa hai. lekin dukh kee baat yah hai ki isee anupaat men paathak snkhyaa men vriddhi naheen huee hai. kam se kam kitaabon kee bikree se to yahee lagataa hai. kitaabon kee vaiyaktik khareed kaa graaf jas kaa tas hai aur adhikatar prakaashak sarakaaree aur saansthaanik khareed par hee aashrit hain. haan, itanaa jroor huaa hai ki raajasthaan ke ek prakaashak bodhi prakaashan ne maatr ek-ek sau rupaye men das pustakon ke do set prakaashit kar aur unhen theek se bech kar is thahare paanee men halachal paidaa karane kee ek koshish kee. lekin shesh prakaashan jagat par is prayaas kee koee sakaaraatmak pratikriyaa dekhane ko naheen milee. hindee saahity kee duniyaa men ek badee baat yah huee hai ki naee takaneek ne lekhak ko usakee rachanaasheelataa ke prasaar ke lie anek vaikalpik maadhyam sulabh karaa die hain. pichhale baras hindee ke nae lekhakon ke alaavaa anek pratishthit lekhakon ne bhee blog, fesabuk vagairah kaa khoob prayog kar in nae maadhyamon ko apanee sveekriti pradaan kee. fesabuk par bahut saare muddon par jeevnt bahasen chaleen. blogs par bhee kaafee kuchh behatareen dekhane ko milaa. ek aur khaas baat yah huee ki vidhaaon kee jakadbandee men bahut kamee aaee aur unamen paarasparik ant:kriyaa badhee. mujhe yah baat bhee mahatvapoorn lagatee hai ki angrejee sahit anek videshee bhaashaaon kee nav prakaashit pustaken ab turnt hindee men bhee sulabh hone lagee hain. nishchay hee isase bhee hindee kee duniyaa samriddh ho rahee hai. to kul milaakar bhaashaa aur saahity donon hee drishtiyon se beetaa saal milaa-julaa rahaa hai. ◙◙◙ dinaank 25 disambar 2011 ko dainik delee nyooj men prakaashit aalekh kaa kinchit parivartit roop.